Azərbaycan, Bakı, 6 iyul /Trend, müxbir E.İsmayılov/
Azərbaycan qazının nəqli ilə bağlı həll olunmamış məsələlər ARDNŞ-nin (Azərbaycan Respublikası Dövlət Neft Şirkəti) qazın potensial alıcılara satışı imkanlarını məhdudlaşdırır. Bu barədə çərşənbə axşamı ARDNŞ-nin yüksəkvəzifəli nümayəndəsi bildirib.
Hazırda ARDNŞ perspektiv qaz kəməri layihələri ilə yanaşı, Yunanıstan, Suriya, Bolqarıstan, Rumıniya və digər Avropa ölkələrinə qaz nəqli imkanlarını nəzərdən keçirir.
"Bizim gündəlikdə daşınma məsələsi durur. Biz qaz alıcılarını, məsələn, Suriya və digər ölkələri müəyyən həcmlərlə təmin edə bilərik. Lakin biz bilirik ki, mövcud boru kəmərləri infrastrukturunun gücü bu prosesi məhdudlaşdırır", - ARDNŞ nümayəndəsi bildirib.
Mənbənin sözlərinə görə, texniki imkanların mövcud olacağı təqdirdə belə kommersiya və tarif məsələlərinin həlli vacibdir.
"Ona görə də biz Suriyaya qaz nəqli və satışı imkanlarına digər məsələlərin kompleksində baxırıq", - ARDNŞ nümayəndəsi deyib.