Azərbaycan, Bakı, 8 iyul /Trend, müxbir Ü.Sadıxova/
Azərbaycanda aparılan danışıqlar zamanı Azərbaycan neftinin Misirə tədarükü və onun emalı məsələləri müzakirə edilib. Bu barədə Trend-ə Bakıda Misirin neft naziri Samih Fəhmi bildirib.
"Biz Misir bazarında neft məhsullarının realizəsi məsələsini də nəzərdən keçimişik", - Fəhmi deyib.
"Bakıda keçirilən görüşlərdə müzakirə edilən vacib mövzulardan biri də Misirdə strateji perspektiv neft-qaz strukturlarında birgə kəşfiyyat işlərinin aparılması olub. Misir Azərbaycan neftinin Süveyş kanalı vasitəsilə Qırmızı dənizə və daha sonra Asiyanın cənub-şərqinə və Yaponiyaya nəqli təklifi ilə də çıxış edib, - nazir qeyd edib.
"Biz Azərbaycan və Misirdən kənarda əməkdaşlığı da müzakirə etmişik. Biz Liviyadakı strateji yataqlarda və ya Misirin geniş əməkdaşlıq etdiyi Afrikanın digər yerlərində işləyə bilərik", - Fəhmi vurğulayıb.
Afrikada Misirin neft və qazından geniş istifadə olunur. Misirin Milli Neft Şirkəti 15 ölkədə, o cümlədən Venesuelada işləyir.
"Biz daha irəliyə, Avropa ölkələrinə və keçmiş sovet məkanına doğru hərəkət etmək istəyirik", - Fəhmi bildirib.