Azərbaycan, Bakı, 12 iyul /Trend, müxbir S.Süleymanov/
"Kazmunayqaz" Kəşfiyyat Hasilat" (KMQ KH) "Kazmunayqaz" Milli Şirkəti SC-nin buraxdığı 220 milyard tenge (1,5 milyard dollar) həcmində istiqrazları 3 illik tədavül müddəti ilə almaq barədə niyyətini elan edib.
"Bu sövdələşmə şirkətin artım strategiyasını maliyyələşdirmək bacarığını qoruyub-saxlamaqla kredit risklərinin şaxələndirilməsinə və azaldılmasına imkan verəcək. Səhmlərin alınması şirkətin səhmdarları üçün pul vəsaitlərindən istifadənin şəffaflığının artırılmasına kömək edəcək", - KMQ KH Şirkətinin baş direktorunun iqtisadiyyat və maliyyə məsələləri üzrə müavini Janneta Bekejanova bu sövdələşməni şərh edərkən bildirib.
"Bu sövdələşmə "Kazmunayqaz" Şirkətlər Qrupuna KMQ KH minoritar səhmdarlarının maraqlarının müdafiəsini təmin etməklə malik olduğu nağd vəsaitlərdən səmərəli istifadə etməyə imkan verəcək. Biz "Kazmunayqaz" MŞ və KMQ KH arasında bütün səhmdarların marağında olan uzunmüddətli sərfəli əməkdaşlığa köklənmişik", - "Kazmunayqaz" MŞ SC-nin korporativ maliyyələşdirmə və aktivlərin idarə olunması üzrə baş meneceri Ardak Kasımbek bildirib.
Şirkətin mətbuat xidmətinin məlumatına görə, 2010-cu il iyunun 25-də buraxılan istiqrazların nominal dəyəri 1,5 milyard dollar təşkil edir, kupon mükafatlandırmasının dərəcəsi illik 7%, tədavül müddəti 3 ildir. Sövdələşmə KMQ KH şirkətinə müəyyən edilmiş mərhələni keçdikdən sonra, istiqrazların müvafiq həcminin hesablanması yolu ilə "Kazmunayqaz" MŞ SC-nin aktivlərinin alınmasını maliyyələşdirməyə imkan verir. Bundan başqa, sövdələşmənin şərtlərinə görə, "Kazmunayqaz" MŞ tədavüldə olan istiqrazların müvafiq sayına qarşı KMQ KH şirkətindən gələcək dividendlərin məbləğinin hesablanmasını həyata keçirəcək. "Sövdələşmə kredit mövqelərinin şaxələnməsi və genişlənməsinə, risklərin azaldılmasına imkan verəcək ", - məlumatda deyilir.
KMQ KH şirkəti ilə "Kazmunayqaz" MŞ arasında imzalanan qarşılıqlı münasibətlər haqda müqavilənin şərtlərinə görə, istiqrazların alınması üzrə qərar KMQ KH-nin müstəqil direktorları tərəfindən təsdiqlənib. "NM Rothschild & Sons Limited"in ekspert rəyini alan müstəqil direktorlar istiqrazların alınması üzrə sövdələşməni ədalətli və KMQ KH Şirkətinin minoritar səhmdarları üçün əlverişli hesab edirlər.
İstiqrazların buraxılış şərtləri istiqrazlara "Baa2" reytinqi verən "Moody's Investors Service" Beynəlxalq Reytinq Agentliyində baxılıb.
"Kazmunayqaz" neft-qaz sahəsində ölkənin maraqlarını təmsil edən karbohidrogenlərin kəşfiyyatı, hasilatı, emalı və nəqli üzrə milli operatordur. Şirkət KMQ KH Şirkətinin dövriyyədəki sadə səhmlərinin, təxminən, 63 faizinə sahibdir. "Kazmunayqaz" MŞ SC-nin səhmlərinin 100 faizi "Samruk-Kazın" Milli Xeyriyyə Fondu SC-yə məxsusdur.