Azərbaycan, Bakı, 15 iyul /Trend/
Azərbaycanın elektrik potensialının artırılması üzrə mühüm layihələrdən olan 780 meqavat gücə malik "Cənub" elektrik stansiyasının tikintisi üçün bütün zəruri avadanlıq təyinat yerinə gətirilib. Bu barədə "Azərenerji" SC-nin məlumatında deyilir.
Hazırda qazlaşdırılmış qurğunun özülünün betonlaşdırılması üzrə işlər görülür. 5000 kubmertr su tutumuna malik su anbarının tikintisi başa çatdırılıb.
Stansiyanın ərazisi 20 hektar təşkil edir. Stansiyanın faydalı fəaliyyət koeffisenti (FFK) ən yüksək dünya standartlarına uyğun olacaq. 1 kvt/saat elektrik enerjisinin alınması üçün cəmi 237 qram şərti yanacaq lazım olacaq. "Cənub"un oxşar stansiyalardan üstünlüyü, onun üç yanacaq növündə - mazut, qaz və dizellə işləməsindədir.
İl ərzində 780 milyon kubmetr təbii qaza və ya 650 min ton mazuta qənaət ediləcək. İllik enerji hasilatı 6 milyard kvt/saat təşkil edəcək.
Mürəkkəb metal konstruksiyalar, körpü kranları, mazut çənləri və digər zəruri avadanlıqlar respublikada ilk dəfə olaraq yerli tikinti şirkəti AZENCO tərəfindən istehsal edilir.
Xatırladaq ki, 1050 meqavat gücə malik Şirvan İstilik-Elektrik Stansiyası Avropada ilk açıqtipli stansiyadır. O, 1967-ci ildən fəaliyyət göstərir. Bu isə o deməkdir ki, stansiya normativ göstəricilərdən iki dəfə artıq istismar olunur.
Bununla əlaqədar 780 meqavat gücə malik yeni "Cənub" elektrik stansiyasının tikintisinə başlanılıb.