Аzərbaycan, Bakı, 23 iyul /Trend, müxbir E.İsmayılov/
Gürcüstan 2012-ci ilin birinci yarısında Azərbaycan, Gürcüstan və Türkiyənin enerji sistemlərinin birləşdirilməsi layihəsi ("Enerji körpüsü") çərçivəsində yüksəkvoltlu elektrik ötürücü xətlərin inşası prosesini tamamilə başa çatdıracaq. Bu barədə cümə günü Bakıda Gürcüstanın energetika naziri Aleksand Xetaquri bildirib.
Onun sözlərinə görə, Gürcüstan artıq yüksəkvoltlu ötürücü xətlərinin inşasına başlayıb. Azərbaycan tərəfdən "Azərenerji" ASC də (Azərbaycanda elektrik enerjisi istehsalı və paylanması) öz növbəsində Gürcüstanla sərhədə qədər ötürücü xətti tikməlidir.
"Biz artıq Gürcüstan ərazisində yüksəkvoltlu ötürücü xəttin inşasına başlamışıq, Azərbaycan sərhədinə qədər tikinti 2011-ci ilin sonuna kimi, Türkiyə sərhəddinə qədər 2012-ci ilin birinci yarısında başa çatacaq", - Xetaquri deyib.
Nazirin sözlərinə görə, enerji sisteminin birləşdirilməsi Bakı-Tbilisi-Ceyhan neft kəməri və Bakı-Tbilisi-Ərzurum qaz kəmərinin inşasından sonra Azərbaycan, Gürcüstan və Türkiyə arasında gerçəkləşən növbəti transmilli energetika layihəsi olacaq.
Layihə çərçivəsində Gürcüstanda Azərbaycanla sərhəddən Türkiyə ilə sərhədə qədər 350 kilometrdən çox uzunluqda və 120 milyon avro dəyərində xəttin inşası üzrə işlər aparılmalıdır.
Ötən il Azərbaycan, Gürcüstan və Türkiyə "Enerji körpüsü" (Power Bridge) layihəsi üzrə qarşılıqlı anlaşma haqqında memorandum imzalayıblar. Üç ölkə tərəfindən həyata keçirilən birgə layihə ABŞ-ın Beynəlxalq İnkişaf Agentliyi (USAID) tərəfindən maliyyələşdirilir.
USAID və ABŞ-ın Energetika Assosiasiyası birlikdə maliyyə və texniki dəstək göstərirlər.
İşçi qrupu hər üç ölkədə yüksəkgərginlikli şəbəkələrin işini analiz edəcək, şəbəkənin gücünü artırmağa, elektrik enerjisinin mübadiləsi və satışına kömək edəcək regional perspektivlər planında investisiyaların identifikasiyasını həyata keçirəcək. Bu, bütün sistemin təhlükəsizliyini optimallaşdırır.