Azərbaycan, Bakı, 28 iyul /Trend/
"Ekol Mühəndislik Xidmətləri" QSC tərəfindən ARDNŞ-nin Z.Tağıyev adına NQÇİ-nin mədən ərazisində şlamların bioremediasiyası çərçivəsində uzun illər yığılıb qalmış 36 min kubmetrdən çox neft şlamı çıxarılıb. Bu barədə QSC-nin çərşənbə günü yayılan məlumatında deyilir. Layihə 10 hektar sahədə işlərin aparılmasını nəzərdə tutur.
Məlumatda deyildiyinə görə, layihənin həyata keçirilməsinə cari ilin fevralında başlanılıb. Bu günə qədər QSC tərəfindən təmizlənən ərazilərə 40 min kubmetrdən çox torpaq daşınıb. Hazırda QSC layihədə nəzərdə tutulan işlərin həyata keçirilməsini davam etdirir.
2006-cı ilin martında Abşeron yarımadasında mövcud ekoloji problemlərin həlli üçün yaradılan "Ekol Mühəndislik Xidmətləri" QSC-nin həmtəsisçiləri ARDNŞ (51%) və "Lancer S.A. Services"dir (49%).