Türkmənistan, Aşqabad, 9 avqust /Trend, müxbir H.Həsənov/
İran və Türkmənistan energetika və nəqliyyat kommunikasiyaları sahəsində birgə layihələr üzrə hökumətlərarası danışıqlar keçiriblər. Bu barədə rəsmi türkmən mənbəyi məlumat verib.
Onun sözlərinə görə, bu məqsədlə İran İslam Respublikası Su Təsərrüfatı Nazirliyinin mühəndis texnologiyaları idarəsinin rəisi Məhəmməd Hacı Rasulihinin başçılıq etdiyi nümayəndə heyəti Aşqabadda olub.
İki qonşu dövləti həyata keçirilmiş bəzi layihələr bir-birinə bağlayır. Bunlardan Mərkəzi Asiya dövlətlərini Avropa ilə birləşdirən və mühüm keçid tranzitinə çevrilən Tecen-Sərxs-Məşhəd dəmir yolu, Korpec-Kurt-Kui qaz kəməri, Balkanabat-Əliabad müasir yüksəkcərəyanlı elektrik xətti, "Dostluq" su anbarı və digər tikililəri göstərmək olar. Hazırda bu istiqamətdə işlər davam etdirilir.
İran nümayəndə heyəti energetika və sənaye, eləcə də su təsərrüfatı nazirliklərində görüşlər keçirib. Görüşlərdə gələcək qarşılıqlı faydalı əməkdaşlığın inkişaf və perspektiv istiqamətləri haqqında fikir mübadiləsi aparılıb.
