Azərbaycan, Bakı, 10 avqust /Trend /
Bakı-Tbilisi-Ceyhan (BTC) ixrac neft boru kəməri ilə yanvar-iyul aylarında 21,6 milyon ton neft nəql olunub. Bu barədə ARDNŞ-in çərşənbə axşamı yayılan məlumatında deyilir. Avqustun 1-nə olan məlumata görə, neft boru kəməri istismara verilən gündən 128,1 milyon ton neft nəql olunub.
Məlumatda qeyd olunduğuna görə, iyulda BTC ilə 3,4 milyon ton neft nəql edilib.
Yanvar-iyul aylarında Türkiyənin Ceyhan limanından dünya bazarlarına 21,8 milyon ton neft çıxarılıb. BTC istismara verilən gündən 2010-cu ilin avqust ayının 1-nə qədər Ceyhan limanından 126,4 milyon ton Azərbaycan nefti dünya bazarlarına yola salınıb.
Məlumatda qeyd edildiyinə görə, iyulda Ceyhandan dünya bazarlarına 3,5 milyon ton neft göndərilib.
BTC neft kəmərinin ümumi uzunluğu 1 768 km-dir. Bunun 443-ü Azərbaycan, 249-u Gürcüstan, 1 076 km-i isə Türkiyə ərazisindən keçir. Boru kəmərinin tikintisi 2003-cü ilin aprelində, onun neftlə doldurulması isə 2005-ci il mayın 18-də başlayıb.
BTC-nin tikintisi 4 milyard dollara başa gəlib. Bu, tikinti işləri, boru kəmərinin doldurulmasına çəkilən xərclərdir. Maliyyə xərcləri və bank faizlərinin ödənilməsi bura daxil deyil. Ümumi maliyyə kreditinin məbləği 2,6 milyard dollar təşkil edir.
"BTC Co"nun səhmdarları aşağıdakılardır: bp (30,1 faiz); AzBTC (25 faiz); "Chevron" (8,90 faiz); "Statoil" (8,71 faiz); ТРАО (6,53 faiz); "Eni" (5 faiz ); "Total" (5 faiz); "İtochu" (3,40 faiz); "Inpex" (2,50 faiz); "ConocoPhillips" (2,50 faiz) və "Amerada Hess" (2,36 faiz).
