Azərbaycan, Bakı, 25 avqust /Trend, müxbir E.İsmayılov/
Türkiyə ərazisi vasitəsilə Bakı-Tbilisi-Ceyhan (BTC) boru kəməri ilə bu ilin yanvar-iyul aylarında 163,23 milyon barelə yaxın neft nəql edilib. 2009-cu ilin yanvar-iyul aylarında bu göstərici 165,1 milyon barel neft təşkil edib. Bu barədə Türkiyənin "Botaş" dövlət boru kəməri şirkətinin rəsmi internet səhifəsində yayılan məlumatda deyilir.
Məlumatda deyildiyinə görə, iyulda Türkiyə ərazisi vasitəsilə Bakı-Tbilisi-Ceyhan (BTC) boru kəməri ilə 27,34 milyon barel neft nəql olunub. Bu göstərici ötən ilin iyulunda 25,6 milyon barel olub.
Ümumilikdə 2009-cu ildə BTC kəməri vasitəsilə təxminən 285,5 milyon barel neft nəql edilib. 2008-ci ildə bu göstərici təqribən 264,1 milyon barel təşkil edib, 2007-ci ildə isə 210 milyon bareli ötüb.
BTC boru kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisindən keçir. Boru kəmərinin inşasına 2003-cü ilin aprelində, neftlə doldurulmasına isə 2005-ci il mayın 18-də başlanılıb.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz ); Total (5 faiz); Itochu (3,40 faiz ); Inpex (2,50 faiz); ConocoPhillips (2,50 faiz) və Amerada Hess (2,36 faiz).
Türkiyə ərazisi vasitəsilə İraq-Türkiyə boru kəməri ilə bu ilin yanvar-iyul aylarında 71,31 milyon barel neft nəql olunub. İyul ayında bu göstərici 11,3 milyon barel neft təşkil edib, iyunda isə bu göstərici 11,8 milyon barel olub. Ötən il bu boru kəməri ilə 167,6 milyon barel neft nəql olunub, 2008-ci ildə isə bu göstərici 135,5 milyon barel təşkil edib.
Türkiyə ərazisi vasitəsilə Ceyhan-Qırıqqala boru kəməri ilə bu ilin yanvar-iyul aylarında 8 min barelə yaxın neft nəql edilib. İyul ayında bu göstərici 2,1 min barel, iyunda isə 1,85 milyon barel neft təşkil edib. Ümumilikdə 2009-cu ildə Ceyhan-Qırıqqala boru kəməri ilə 20,2 milyon barelə yaxın neft nəql olunub. 2008-ci ildə bu göstərici 21,4 milyon barel təşkil edib.
Batman-Dördyol boru kəməri ilə bu ilin yanvar-iyul aylarında təqribən 6,7 milyon barel neft nəql olunub. İyul ayında bu göstərici 1,23 milyon barel, iyunda isə 710 min barel olub. Ötən il bu boru kəməri ilə 12,2 milyon barel neft nəql edilib. 2008-ci ildə bu göstərici təxminən 11,1 milyon barel təşkil edib.
