Azərbaycan, Bakı, 26 avqust /Trend/
Noyabrda Bakıda ARDNŞ və Dünya Bankının (DB) dəstəyi ilə səmt qazlarının atmosferə atılmasının azaldılması üzrə beynəlxalq konfrans keçiriləcək. Bu barədə cümə axşamı DB-nin Bakı nümayəndəliyindən bildiriblər.
Avqustun 26-da Bakıda qazların "Qlobal qaz yandırılmalarının azaldılması üzrə tərəfdaşlıq" proqramı (GGFR) çərçivəsində DB-nin missiyası işə başalyıb. İşini sentyabrın 1-də başa vuracaq missiyanın tərkibinə bankın neft-qaz və mədənçıxarma xidmətləri departamentindəki əməliyyatlar üzrə mütəxəssisi Bəxtiyar Kərimov və bu departamentin rəhbəri Bend Svenson daxildir.
Missiya çərçivəsində Dövlət Neft Şirkətinin GGFR-in üçüncü fazasında iştirakına hazırlıq məqsədilə ARDNŞ rəhbərliyi ilə görüş və müzakirələr keçiriləcək. Bundan başqa, qarşıdan gələn konfransa hazırlıq aparılıb, eləcə də şirkət əməkdaşları üçün daxili seminar keçirilib.
ARDNŞ-nin səmt qazlarının atmosferə atılmasının azaldılması planının ilkin versiyası GGFR çərçivəsində hazırlanır.
Hazırda ARDNŞ "Günəşli" və "Neft Daşları" dəniz neft-qaz yataqlarında səmt qazlarının atmosferə atılmasının azaldılması üzrə işlər görür.
ARDNŞ 2008-ci ildən GGFR-in proqramının iştirakçısıdır. ARDNŞ-də səmt qazının utilizasiyası planının (Associated Gas Recovery Plan - AGRP) hazırlanması üçün işçi qrupu yaradılıb. ARDNŞ proqramdan qazların yandırılma həcminin ölçülməsi ilə bağlı dəstək istəyib. Təşkilat da öz növbəsində bu sahədə gələcək fəaliyyətin yaxşılaşdırılması üçün tövsiyələrini təqdim edib.
