...

ARDNŞ və "Qazprom" arasında razılaşdırılmamış məsələ yoxdur – Dövlət Neft Şirkətinin prezidenti

Energetika Materials 1 Sentyabr 2010 18:58 (UTC +04:00)

Azərbaycan, Bakı, 1 sentyabr /Trend, müxbir E.İsmayılov/

ARDNŞ və Rusiyanın "Qazprom" şirkəti arasında Azərbaycan qazının Rusiyaya tədarükü haqqında imzalanan saziş çərçivəsində, xüsusilə də qazın dəyəri ilə bağlı heç bir razılaşdırılmamış məsələ yoxdur. Bu barədə çərşənbə günü ARDNŞ prezidenti Rövnəq Abdullayev bildirib.

Onun sözlərinə görə, tərəflər arasında ildə bir milyard qaz tədarükü üzrə saziş mövcuddur və qaz tədarükünün həcmi artırılacağı təqdirdə, ARDNŞ tərəfdən sazişə əlavələr edilir. Rusiyaya tədarük edilən Azərbaycan qazının qiyməti xüsusi formul əsasında müəyyən edilir.

Azərbaycan qazının Rusiyaya alqı-satqısına dair ortamüddətli müqavilə 2009-cu il oktyabrın 14-də Bakıda imzalanıb. 2010-2014-cü illəri əhatə edən müqaviləyə əsasən, Azərbaycan tərəfi hər il Rusiyaya 500 milyon kubmetrdən az olmayaraq qaz tədarük edəcək. Müqavilədə qaz tədarükünün həcmi göstərilməyib. ARDNŞ yarım il əvvəlcədən qarşı tərəfi tədarük edə biləcəyi həcm barədə məlumatlandıracaq.

Azərbaycan qazının Rusiyaya nəqli 2010-cu ilin yanvarından başlanılıb.

ARDNŞ-nin məlumatına görə, Azərbaycan yanvar-iyul aylarında Rusiyaya ortamüddətli müqavilə çərçivəsində 494,6 milyon kubmetr qaz ixrac edib. İyulda bu göstərici 66,4 milyon kubmetr, iyunda isə 81,54 milyon kubmetr təşkil edib.

Xəbər lenti

Xəbər lenti