Azərbaycan, Bakı, 7 oktyabr /Trend, müxbir E.İsmayılov/
Gələn ilin baharında ARDNŞ-nin Türkiyədə yeni neft emalı zavodunun təməlqoyma mərasimi keçiriləcək. Bu barədə ARDNŞ-nin yüksək vəzifəli nümayəndəsi deyib.
Zavodun ümumu istiqaməti müəyyənləşib, eləcə də onun 10 milyonluq ümumi gücü də müəyyənləşib. Hazırda potensial texnologiya sahibləri ilə danışıqlar aparılır. İşlər başa çatdıqdan sonra bu isqamətdə növbəti mərhələ - ətraflı mühəndislik işlərinə hazırlıq başlayacaq.
"Ətraflı mühəndislik işləri ola bilsin ki, bu il deyil, gələn il başlasın. Və yaza parelel olaraq, yəqin ki, təməl daşı qoyulacaq", - ARDNŞ nümayəndəsi qeyd edib.
Onun sözlərinə görə, plana əsasən, tikinti üzrə işlərin 2014-cü ilədək başa çatdırılması planlaşdırılır.
Yeni NEZ ARDNŞ-nin iştirak payına malik olduğu Türkiyənin "Petkim" neft-kimya kompleksinin tələbatlarını ödəmək üçün tikilir. Zavodun tikintisinə 3,5 - 5 milyard dollar məbləğində investisiyanın yatırılması nəzərdə tutulur.
2008-ci ildə "SOCAR/Turcas Petrol/Injaz Projects" şirkətlər alyansı Türkiyənin "Petkim" neft-kimya holdinqində 51 faizlik səhm paketinin alınması üçün tenderin qalibi olub. Buna görə alyansa 2,04 milyard dollar təklif edilib. Hazırda Türkiyə zəruri kimya məhsullarının 70-75 faizini idxal edir. "SOCAR/Turcas/Injaz"ın "Petkim"in inkişafına yatıracağı sərmayələr məhsul idxalını 30 faizədək azaltmağa imkan verir.
İyunun əvvəlində "SOCAR/TURCAS Rafineri AS" Türkiyənin enerji bazarının tənzimləyicisindən neft emalı zavodunun tikintisinə lisenziya alıb. Yeni zavodun gücü ildə 10 milyon ton olacaq və bunun 4 milyon tonu "Petkim"in xammala olan tələbatının ödənilməsinə yönəldiləcək. Yerdə qalan hissə, o cümlədən dizel yanacağı, aviasiya kerosini və digər enerjidaşıyıcılar Türkiyə və Avropa bazarlarında satışa çıxarılacaq.