Azərbaycan, Bakı, 11 oktyabr /Trend, müxbir İ.Xəlilova/
2011-ci ildə neft sektorundan dövlət büdcəsinə daxilolmalar 8,160 milyard manat səviyyəsində proqnozlaşdırılır ki, bu da gəlir hissəsinin ümumi həcminin 67,66 faizini təşkil edir. Bu barədə Azərbaycanın maliyyə naziri Samir Şərifov parlament komitələrinin iclasında 2011-ci il dövlət büdcəsi layihəsinin müzakirəsi zamanı bildirib. Onun sözlərinə görə, dünyadakı iqtisadi vəziyyətin qeyri-müəyyənliyi nəzərə alınmaqla, büdcə gəlirləri və xərclərinin proqnozlaşdırılması ehtiyatla aparılır və neftin bir barelinin qiyməti 60 dollar dəyərində müəyyən edilir.
"Gələn ildən vergi daxilolmalarının 38 faizi (1,680 milyard manat) neft sektoru hesabına təmin olunacaq ki, bu da cari illə müqayisədə 14,7 faiz (290 milyon manat) azdır", - nazir bildirib.
Bununla yanaşı, gələn il ARDNŞ-dən (Azərbaycan Respublikası Dövlət Neft Şirkəti) daxilolmalar 680 milyon manat, Azərbaycan Beynəalxalq Əməliyyat Şirkətindən (ABƏŞ) daxilolmalar isə 600 milyon manat həcmində proqnozlaşdırılır.
Dövlət Neft Fondundan transfertlər 2010-cu ildəki 5,915 milyard manata nisbətdə 6,48 milyard manat təşkil edəcək.
Ölkə hökumətindən deyildiyi kimi, 2011-ci ildə Azərbaycanın "Azeri Light" marfkalı neftinin hasil olunduğu iri "Azəri-Çıraq-Günəşli" yataqlar blokunun işlənməsi üzrə operator olan ABƏŞ üçün mənfəət vergisindən daxilolmaların 650 milyon manatdan 600 milyon manatadək azalması 2013-cü ilədək altı milyardlıq "Chirag oil project" layihəsinin həyata keçirilməsi ilə əlaqədardır.
"Bu, layihənin iştirakçısı olan neft şirkətlərinin xərclərinin artmasına, müvafiq olaraq, onların mənfəətinin azalmasına gətirib çıxaracaq", - hökumətdən deyiblər.
"Chirag oil project" altı milyard dollar məbləğində sərmayəni nəzərdə tutur. "Azəri-Çıraq-Günəşli"də neft hasilatının artırılması çərçivəsində tikiləcək yeni platformadan "Azeri Light" növlü neftin hasilatının sutkalıq həcminin 183 min barel təşkil edəcəyi planlaşdırılıb. Yeni platformadan sutkada 6,5 milyon kubmetr qaz hasil ediləcəyi gözlənilir. Platformada sutkalıq qaz vurulması həcminin təxminən 2,3 milyon kubmetr olacağı nəzərdə tutulub.
Layihə çərçivəsində qabaqlayıcı qazma işləri 2010-cu ilin ikinci, 2012-ci ilin birinci dövrünü əhatə edəcək. Qazma işləri "Dədə Qorqud" qurğusundan həyata keçiriləcək. Platformadan hasilat 2013-cü ilin sonuna planlaşdırılıb.
Layihənin həyata keçirilməsi çərçivəsində (AÇG üzrə müqavilənin 2024-cü ilədək qüvvədəolma müddəti) ümumilikdə 300 milyon barel neft hasil edilməsi planlaşdırılıb.
"Azəri-Çıraq-Günəşli" layihəsinin iştirakçıları aşağıdakılardır: BP (operator - 37,43 faiz iştirak payı), "ChevronTexaco" (11,27 faiz), ARDNŞ (10 faiz), INPEX (10,96 faiz), "Statoyl" (8,56 faiz), "ExxonMobil" (8,006 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).
Qarşıdakı ildə Azərbaycanda neft hasilatı həcmləri ildə 51 554,2 min ton səviyyəsində proqnozlaşdırılır. Bu həcmdən 43 054,2 min ton "Azəri-Çıraq-Günəşli" yataqlar blokundan hasil olunan "Azeri Light" marfkalı neftin payına düşür, 8,5 milyon ton neft isə ARDNŞ tərəfindən özünün qurudakı və dənizdəki yataqlarından hasil ediləcək.
2010-cu ildə neft hasilatı 51 961,5 min ton həcmində proqnozlaşdırılır ki, bunun da 8,5 min tonu ARDNŞ-də istehsal olunacaq.
Qarşıdakı ildə 29 135,9 milyon kubmetrədək qaz hasil olunması proqnozlaşdırılır ki, bunun 18 179,2 milyon kubmetri satışa çıxarılacaq. 2010-cu ildə qaz hasilatı 27 078,9 milyon kubmetr həcmində nəzərdə tutulub ki, bunun 17 637,7 milyon kubmetri satışa çıxarılacaq.
Oktyabrın 11-nə olan rəsmi məzənnə 0,8020 AZN/USD təşkil edir.
