Azərbaycan, Bakı, 22 noyabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) Azərbaycanın yeraltı qaz anbarlarındakı qazın həcmini 3 milyard kubmetrə çatdırıb. Bu barədə bazar ertəsi neft-qaz sahəsindəki mənbə məlumat verib.
"Hazırda iki yeraltı qaz anbarına vurulan qazın həcmi 2,945 milyard kubmetri ötür ki, bunun da 1,13 milyard kubmetrdən çoxu ötən ildən qalan qazdır", - mənbə deyib.
Hazırda respublikada iki yeraltı qaz anbarı - "Qaradağ" və "Qalmaz" fəaliyyət göstərir.
"Yeraltı qaz anbarlarına qazın vurulması prosesi hələ başa çatmayıb və bu gün bu həcm 2 milyard 945 milyon kubmetr təşkil edir", - mənbə bildirib.
Mənbənin bir müddət əvvəl verdiyi məlumata görə, "Qaradağ" qaz anbarında yerləşən iki kompressor stansiyasından biri artıq əsaslı təmirdədir. "Qaradağ" qaz anbarına qazın vurulması bu yaxınlarda istismara verilən ikinci stansiya vasitəsilə həyata keçirilir.
Ötən il ARDNŞ Azərbaycanın yeraltı qaz anbarlarına 2008-ci ildəki 1,4 milyard kubmetrə nisbətdə 2 milyard kubmetrə yaxın qaz vurub.
Payız-qış mövsümündə istifadə olunması üçün Azərbaycanın yeraltı qaz anbarlarına qazın vurulması prosesi oktyabrda başa çatır. Lakin hava şəraitinin əlverişli olması səbəbindən bu proses noyabrın sonlarınadək davam etdirilir.