Azərbaycan, Bakı, 4 dekabr /Trend/
Yanvar-noyabr aylarında ARDNŞ (Azərbaycan Respublikası Dövlət Neft Şirkəti) Azərbaycanın daxili tələbatının ödənilməsi və ixrac-idxal əməliyyatlarının təmin olunması üçün 9,34 milyard kub metrdən çox qaz sərf edib. Bu barədə şirkətin şənbə günü yaydığı məlumatda deyhilir.
Məlumata görə, sərf olunan qazın 7,99 milyard kub metri sənaye müəssisələrinə, əhaliyə və "Azərenerji" SC-yə (Azərbaycanda elektrik enerjisinin istehsalı və paylanması) verilib. Yerdə qalan həcm Gürcüstan və Rusiya ilə aparılan ixrac əməliyyatlarının, eləcə də Naxçıvan Muxtar Respublikasının (NMR) təbii qazla təmin olunmasına sərf olunub.
Ümumilikdə, yanvar-noyabr aylarında ARDNŞ tərəfindən ölkənin qaz sisteminə 10,6 milyard kub metr qaz satılıb ki, bu da proqnozlaşdırılandan təxminən 1,2 milyard kub metrdən çoxdur. Bununla yanaşı, sənaye müəssislərinin, əhalinin və ixrac əməliyyatları çərçivəsində öhdəliklərin yerinə yetrilməsi üçün ölkənin yeraltı qaz anbarlarından 643,24 milyon kub metr qaz götürülüb. Bununla yanaşı, həmin dövrdə qaz anbarlarına əlavə olaraq 1,9 milyard kub metr qaz vurulub.
Yanvar-noyabrda NMR-in qazla təmin olunması üçün İranla aparılan svop əməliyyatları çərçivəsində 291,6 milyon kub metrdən artıq qaz verilib. Noyabrda bu göstərici 18 milyon kub metrə yaxın təşkil edib.
