Qazaxıstan, Astana, 9 dekabr / Trend, müxbir A.Maratov /
Aktauda inşasına bu il başlanılan yol bitumu istehsalı üzrə zavodun tikintisinin 2012-ci ildə başa çatdırılması planlaşdırılır. Bu barədə Trend-ə Qazaxıstanın neft-qaz nazirinin müavini Aset Maqayov bildirib.
"Artıq "Kazstroyservis NQBK" SC ilə "ТОО CITIC Construction" arasında bitum zavodunun obyektlərinin tikintisi məqsədilə konsorsium yaradılıb", - Maqayov bildirib.
Onun məlumatına görə, Pekində "Caspi Bitum" və "Bank of China Grand Cayman Branch" arasında bu layihənin maliyyələşdirilməsi üzrə kredit sazişi imzalanıb.
Layihənin reallaşdırılması üçün Çinin "CITIC Group" korporasiyası və Qazaxıstanın "Kazakhstan Petrochemical Industries" SC şirkəti arasında hələ 2009-cu ildə paritet əsasda "Caspi Bitum" birgə müəssisəsi yaradılıb.
Manqustau vilayətində Aktau plastmas zavodu bazasında yol bitumunun istehsalı üzrə zavodun inşasına başlanılıb. Ağır Karajanbass neftinin dərin emalı vasitəsilə Qazaxıstanın iqlim şəraitinə uyğun yol tikintisi üçün ildə 420 min ton məhsul istehsal olunacaq.
