Azərbaycan, Bakı, 6 yanvar /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) Xəzərdəki eyniadlı yataqda yerləşən "Bulla Dəniz-82" platformasından kəşfiyyat quyusunun qazılmasını bu ilin yazında başa çatdırmağı planlaşdırır. Bu barədə cümə axşamı ARDNŞ-dəki mənbə məlumat verib.
Onun sözlərinə görə, quyunun qazılması zamanı yaranan problemlə əlaqədar yan gövdənin kəsilməsi barədə qərar qəbul edilib.
"Hazırda yan gövdənin qazılması aparılır. Quyunun qazılması yazda başa çata bilər", - mənbə deyib.
Mənbə bildirib ki, hazırda layihə dərinliyi 6400 metr olan quyuda 5519 metr qazma işləri aparılıb.
Bir müddət əvvəl ARDNŞ-nin birinci vitse-prezidenti Xoşbəxt Yusifzadə bildirmişdi ki, bu quyu perspektivlidir. Bundan əvvəl quyuda baş verən prosesləri müşahidə və onlara nəzarət etmək məqsədilə Geofizika və Geologiya İdarəsi uzaqdan müşahidə sistemi olan "RT-Leuza" quraşdırıb.
"Bulla Dəniz" yatağı 1975-ci ildən istismar olunur. 34 il ərzində yataqdan 62 milyard kubmetr qaz və 11 milyon ton neft və qaz-kondensat hasil edilib.
"Bulla Dəniz" yatağından sutkada 450 min kubmetr qaz hasil edilir. ARDNŞ geoloqlarının fikrincə, bu yataqda qaz hasilatını bir neçə dəfə artırmaq olar.
