Azərbaycan, Bakı, 28 yanvar/Trend, müxbir E.İsmayılov/
ARDNŞ-nin (Azərbaycan Respublikası Dövlət Neft Şirkəti) iştirak payına malik olduğu iri neft-kimya kompleksi "Petkim" 2011-ci ildə öz müəssisələrinin istehsalatının artırılmasına 100 milyon dollar yatıracaq. Bu barədə cümə günü müəssisə rəhbəri Həyat Öztürkün sözlərinə istinadən "Petkim"in məlumatında deyilir.
Onun sözlərinə görə, investisiyalar istehsalın maksimal dərəcədə artırılmasına, texnologiyaların yenilənməsinə və məhsuldarlığın yüksəldilməsinə yönəldiləcək.
"Petkim"in tərkibinə etilen, aşağı təzyiqli polietilen, yüksək təzyiqli polietilen, polipropilen, akrilonitril, aromatizator, etilenqlikol və digər neft-kimya məhsulunun istehsalı üzrə müəssisələr daxildir.
Kompleksin rəhbəri onu da qeyd edib ki, mövcud olduğu 45 il ərzində müəssisə dövriyyə və istehsal üzrə ən yüksək göstəricilərə nail olub.
Dünya maliyyə böhranının dünyada neft-kimya istehsalına təsir göstərməsinə baxmayaraq, 2010-cu ili "Petkim" 92 faizlik istehsal göstəricisi ilə başa vurub.
2008-ci ildə "SOCAR/Turcas Petrol/Injaz Projects" şirkətlər alyansı Türkiyənin "Petkim" neft-kimya holdinqində 51 faizlik səhm paketinin alınması üçün tenderin qalibi olub. Buna görə də alyansa 2,04 milyard dollar təklif edilib. Hazırda Türkiyə zəruri kimya məhsullarının 70-75 faizini idxal edir. "SOCAR/Turcas/Injaz"ın Petkimin inkişafına yatıracağı sərmayələr məhsul idxalını 30 faizədək azaltmağa imkan verir.
"Petkim Petrokimya Holding" plastik qablaşdırmalar, parçalar, PVC, yuyucu vasitələr istehsal edir və Türkiyədə belə məhsulların yeganə istehsalçısıdır. Şirkət məhsullarının ¼-ni ixrac edir.