Аzərbaycan, Bakı, 31 yanvar /Trend, müxbir E.İsmayılov/
Plana uyğun olaraq, cari ilin fevralının 1-dən ARDNŞ (Azərbaycan Respublikası Dövlət Neft Şirkəti) İranın Qaz İxracı üzrə Milli Şirkəti (NIGEC) ilə imzaladığı uzunmüddətli müqavilə çərçivəsində İrana qaz tədarükünə başlayacaq.
"İlkin plana görə, artıq sabahdan İrana qaz tədarükünə başlanacaq", - mənbə bildirib.
Onun sözlərinə görə, ilkin mərhələdə müqavilə çərçivəsində tədarükə NMR-in qaza olan tələbatının ödənilməsi üçün svop əməliyyat çərçivəsindəki 1,3 milyon kubmetrlə yanaşı bir milyon kubmetr (və ya bir milyondan azacıq çox) səviyyədə başlamaq planlaşdırılır. Mənbənin qeyd etdiyi kimi, İrana əlavə həcmin tədarükü Astarada əlavə kompressor stansiyasının tikintisinin başa çatması sayəsində mümkün olub. "Stansiyanın tikintisi çərçivəsində işlər başa çatıb".
ARDNŞ kompressor stansiyalarının tikintisi çərçivəsində planlaşdırılan on stansiyadan altısının tikintisini başa çatdırıb. Yerdə qalan dörd stansiya il ərzində obyektlərdə quraşdırılacaq.
ARDNŞ və NIGEC yanvarın 12-də Azərbaycan qazının İrana nəqli ilə bağlı müqavilə imzalayıblar. Beş il müddətinə imzalanan müqaviləyə əsasən, 2011-ci ildə Azərbaycandan İrana 1 milyard kubmetr qaz nəql olunacaq. Qaz tədarükü həcminin gələcəkdə artırılacağı nəzərdə tutulur.
Müqaviləni ARDNŞ prezidenti Rövnəq Abdullayev və NIGEC-in baş direktoru Cavad Oci imzalayıblar.
Azərbaycan və İranı ümumi uzunluğu 1474,5 kilometr (296,5 kilometri Azərbaycan ərazisində) olan Qazı Məmməd-Astara-Bind-Biand qaz kəməri əlaqələndirir. Marşrut 1971-ci ildə istismara verilən Qazax-Astara-İran boru kəmərinin qoludur. Bu istiqamətdə üç - Qazı Məmməd, Ağdaş və Qazax kompressor stansiyaları tikilib. Boru kəmərinin diametri 1200 millimetridir.
