Azərbaycan, Bakı, 14 fevral /Trend, müxbir E.İsmayılov/
Azərbaycanın Avropa ölkələrinə ixrac etmək üçün kifayət qədər qaz ehtiyatları var. Bu barədə çərşənbə axşamı Azərbaycanın sənaye və energetika nazirinin müavini Natiq Abbasov bildirib.
Onun sözlərinə görə, ölkə Avropaya tədarük üçün ehtiyatlara malikdir, lakin ixraca tam hazır olmaq barədə yalnız texniki məsələlər tam həll olunduqdan, bu qazın alıcısı müəyyən edildikdən və uzunmüddətli müqavilələrin bağlanmasından sonra danışmaq mümkündür.
"Azərbaycanın qaz ehtiyatları var [...] və ölkə nisbətən daha əlverişli variantdan istifadə etməklə qaz tədarükünü həyata keçirəcək", - nazir müavini bildirib.
Abbasovun dediyi kimi, hazırda qazın dünya bazarlarına nisbətən daha sərfəli ixracının axtarışı üzrə iş aparılır.
Nazir müavini həmçinin bildirib ki, proqnozlara görə, Azərbaycanda qaz hasilatı 2010-cu ildə hasil olunan 27 milyard kubmetrə nisbətən iki dəfə artacaq ki, bu da ölkənin ixrac imkanlarının çoxalması deməkdir.
Hazırda Azərbaycan "Nabukko", Transadriatik qaz kəməri (TAP), "Ağ axın", ITGI (Türkiyə-Yunanıstan-İtaliya) kimi qaz kəməri layihələrinin daxil olduğu "Cənub enerji dəhlizi" çərçivəsində Avropaya qaz tədarükü imkanlarını nəzərdən keçirir.
