Azərbaycan, Bakı, 2 mart /Trend, müxbir E.İsmayılov/
Xəzərin Azərbaycan sektorundakı "Şahdəniz" qaz-kondensat yatağının işlənməsi layihəsinə dair müqavilənin 2036-cı ilədək uzadılması barədə qərar Azərbaycan qazının tranziti və onun satışı məsələlərinin yubanması ilə əlaqədardır. Trend-in məlumatına görə, bu barədə ARDNŞ prezidenti Rövnəq Abdullayev deyib. Əvvəlcə müqavilənin 2031-ci ilədək qüvvədə olacağı nəzərdə tutulmuşdu.
"Şahdəniz" yatağının işlənməsinin ikinci mərhələsindən Azərbaycan qazının satışı və tranziti ilə bağlı qərar yubandığından və hələ ki qəbul edilmədiyindən, müqavilənin müddətinin uzadılması barədə qərar qəbul edilib", - Abdullayev vurğulayıb.
Onun sözlərinə görə, müqavilənin uzadılmasının qarşılığında ARDNŞ "Şahdəniz" yatağından qaz ixracı üçün yeni qaz kəmərinin tikintisi və ya mövcud Cənubi Qafqaz boru kəmərinin genişləndirilməsi hüququnu əldə edib.
BP şirkəri bu gün məlumat yayaraq bildirib ki, Xəzərin Azərbaycan sektorundakı "Şahdəniz" qaz-kondensat yatağının işlənməsi layihəsinin tərəfdaşları bu yataq üzrə müqavilənin qüvvədə olma müddətinin 2036-cı ilədək uzadılması haqqında saziş imzalayıblar.
"Bu saziş qaz tədarükü üçün uzunmüddətli müqavilələrin təmininə şərait yaradacaq", - məlumatda deyilir.
2010-cu ildə Azərbaycanın qaz-kondensat yatağı "Şahdəniz"dən 6,9 milyard kubmetrə yaxın qaz və 1,9 milyon ton (14,7 milyon barel) kondensat hasil edilib. Ötən il yataqda orta sutkalıq hasilat 19 milyon kubmetr qaz və 40,2 min barel kondensat təşkil edib.
2009-cu ildə "Şahdəniz" yatağından qaz hasilatı 6,2 milyard kubmetr qaz (orta hesabla sutkada 16,9 milyon kubmetr) və 1,7 milyon ton kondensat təşkil edib.
2006-cı ilin sonundan ("Şahdəniz"də hasilatın başlanılması) ötən ilin birinci rübü başa çatanadək dünya bazarlarına 49,7 milyon barel kondensat (6,3 milyon tona yaxın) göndərilib.
Yatağın işlənməsinin birinci mərhələsi çərçivəsində hasilatın ən yüksək həddi 8,6-9 milyard kubmetr səviyyəsində proqnozlaşdırılır. Proqnozlara görə, yatağın işlənməsinin ikinci mərhələsi çərçivəsində qaz hasilatı həcmini ildə daha 25 milyard kubmetrədək çatdırmaq mümkün olacaq.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.