Azərbaycan, Bakı, 7 mart /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) "Azərikimya" İB-nin tullantılarının idarə olunması proqramını hazırlayacaq. Bu barədə bazar ertəsi ARDNŞ-dəki mənbə məlumat verib.
Onun sözlərinə görə, ARDNŞ-nin Ekologiya İdarəsi İB müəssisələrinin ərazilərində uzun illərdən bəri yığılıb qalan tullantıların monitorinqini keçirəcək. Bu işlər başa çatdıqdan sonra proqramın hazırlanması üzrə işlərə başlanacaq.
"Monitorinq başaçatma mərhələsindədir, bundan sonra İB-nin tərkibinə daxil olan kimya müəssisələrinin çoxillik istismarının nəticəsi olan tullantıların idarə olunması proqramı hazırlanacaq", - mənbə deyib.
Onun sözlərinə görə, ARDNŞ proqramın hazırlanmasından sonra ekoloqlarla birgə tullantılardan hansılarının utilizasiya, təkrar emal və ya dondurulmaq üçün yararlı olduğunu müəyyən edəcək.
"Azərikimya" İB ARDNŞ-nin tərkibinə daxildir və Azərbaycanda kimya məhsullarının ən iri istehsalçısıdır. Hazırda ARDNŞ istehsal olunan məhsulların keyfiyyətinin artırılması, məhsul növlərinin genişləndirilməsi və kimyəvi xammaldan hazır məişət məhsullarının istehsalı sahəsində inkişafa nail olmaq məqsədilə neft-kimya kompleksinin modernləşdirilməsi üzrə işlər aparır.
