Azərbaycan, Bakı, 8 sentyabr /Trend, müxbir E.İsmayılov/
Xəzərin Azərbaycan sektorunda yerləşən "Şəfəq-Asiman" perspektiv strukturundakı kəşfiyyat quyusunda qazma işlərinin aparılması texnologiyası və üsulları üçölçülü seysmik tədqiqatların aparılması və əldə olunan göstəricilərin təhlilindən sonra təyin olunacaq. Trend-in məlumatına görə, bu barədə cümə axşamı strukturda seysmik tədqiqatların ətraf mühitə təsirinə dair hesabatın ictimai dinləmələrində "BP-Azərbaycan" şirkətinin ictimaiyyətlə əlaqələr şöbəsinin rəhbəri Tamam Bayatlı deyib.
O bildirib ki, təhlükəsizliyi tam və yüksək səviyyədə təmin etmək üçün qazma işlərində ən müasir texnologiya tətbiq olunacaq.
Quyu üçün rezervuarın yeri 7000 metr səviyyədə təyin olunub. Blokun 650-950 metr dərinlikdə yerləşməsi, yüksək təzyiq və temperatur baxımından kifayət qədər çətin olmasına baxmayaraq, BP artıq belə bir şəraitdə qazma təcrübəsinə malikdir.
Onun sözlərinə görə, xüsusilə, "Şahdəniz" layihəsində "BP-Azərbaycan" şirkəti 6 işçi quyusu və eyni miqdarda qiymətləndirici və kəşfiyyat quyusu qazıb.
Həmçinin, Bayatlı deyib ki, şirkət "Azəri-Çıraq-Günəşli" blokunda 50-dən çox quyu qazıb.
"Bütün bu işlər heç bir hadisə baş vermədən və ətraf mühitə heç bir zərər vurulmadan həyata keçirilib", - o bildirib.
"Şəfəq-Asiman" bloku üzrə müqavilə 30 il müddətinə imzalanıb. Kəşfiyyat dövrü 4 ildir. Müqavilənin sonradan daha 3 il uzadılması mümkündür. Birinci mərhələdə 2 quyunun qazılması planlaşdırılır. İkinci mərhələdə, zərurət olarsa, daha 2 quyu qazılacaq. İstismar dövrünə keçərkən tərəflər layihə çərçivəsində birgə operatorluq edəcəklər. Sazişdə iştirak payının bölüşdürülməsi 50-nin 50-yə nisbətindədir.
Dəniz blokunun ehtiyatları 300-500 milyard kubmetr qaz həcmində qiymətləndirilir.
"Şəfəq" və "Asiman" strukturları Bakıdan 125 kilometr cənub-şərqdə yerləşir. 2009-cu ilin iyulunda ARDNŞ və BP Londonda Xəzər dənizinin Azərbaycan sektorundakı "Şəfəq" və "Asiman" perspektiv strukturlarının birgə geoloji kəşfiyyatı və işlənməsi haqqında qarşılıqlı anlaşma memorandumu imzalayıblar.
BP Azərbaycanda əsas xarici neft sərmayədarıdır. Şirkət "Azəri-Çıraq-Günəşli" neft-qaz yataqları blokunun və "Şahdəniz" qaz-kondensat yatağının işlənməsi üzrə layihələrə də başçılıq edir. ВР həmçinin Bakı-Tbilisi-Ceyhan və Bakı-Supsa neft kəmərlərinin də operatorudur.
