Azərbaycan, Bakı, 4 oktyabr /Trend müxbir E.İsmayılov/
Gələn ilin yazında Heydər Əliyev adına yarımdalma qazma qurğusu Britaniyanın BP şirkəti ilə qurğunun operatoru olan Danimarkanın "Maersk Drilling" şirkəti arasında imzalanmış müqavilə çərçivəsində işlərə başlanacaq. Bu barədə Trend-ə çərşənbə axşamı neft-qaz bazarındakı mənbə məlumat verib.
Bir müddət əvvəl tərəflər BP-nin Azərbaycanda həyata keçirdiyi müqavilələr çərçivəsində qazma işlərini nəzərdə tutan ortamüddətli müqavilə imzalayıblar. İşlərin böyük hissəsi "Şahdəniz" yatağının işlənməsinin ikinci mərhələsi çərçivəsində qabaqlayıcı qazmanın payına düşəcək.
Mənbənin sözlərinə görə, əvvəllər BP üçün işlərin martda başlanacağı ehtimal edilirdi. Lakin Xəzərin Azərbaycan sektorundakı "Abşeron" yatağında qazma işlərinin başa çatması tarixinin dəyişdirilməsi ilə əlaqədar onlar planlaşdırılan müddətdən bir qədər gec başlayacaq.
"Şahdəniz" yatağının genişmiqyaslı işlənməsi çərçivəsində nəzərdə tutulan çoxlu sayda quyunun qazılması üçün qazma qurğuları kifayət etmir. Məhz ona görə də BP işlərə Heydər Əliyev adına qazma qurğusunu cəlb edib. "Şahdəniz" yatağının genişmiqyaslı işlənməsi çərçivəsində iki dəniz platforması quraşdırılacaq və 26 sualtı quyu qazılacaq.
"Şahdəniz" layihəsinin birinci mərhələsi çərçivəsində hasilatın pik səviyyəsi 9 milyard kubmetr qaz və 50 min barel kondensat səviyyəsində proqnozlaşdırılır. İkinci mərhələ çərçivəsində yataqdan əlavə olaraq 16 milyard kubmetr qaz hasil olunacağı planlaşadırılır.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, "Statoil" - 25,5%, NICO - 10%, "Total" - 10%, "LUKoil" - 10%, TPAO - 9%, ARDNŞ - 10%.
