Azərbaycan, Bakı, 25 yanvar / Trend, müxbir E.İsmayılov/
"Ekol Mühəndislik Xidmətləri" QSC "Baku White city" layihəsi çərçivəsində 2010-cu ilin fevral ayından 2012-ci ilin yanvarınadək "Qara Şəhər" ərazisində 778 min m3 -dən çox neftlə çirklənmiş torpaq çıxarıllb. Bu barədə çərşənbə günü QSC-nin rəsmi saytında məlumat verilir.
İşlər White city layihəsinə daxil olan "Yaşıl ada" ərazisində aparılıb. Məlumata görə, göstərilən dövrdə 14 hektara qədər sahə çirklənmədən təmizlənib.
"İcra müddətində QSC tərəfindən layihə ərazisindən 26 min m3-dən çox neftşlam çıxararaq müvafiq qaydada anbarlaşdırılıb", - məlumatda deyilir.
Bakı şəhərinin ekoloji vəziyyətinin yaxşılaşdırılmasına xidmət edən "Baku White City" Prezident İlham Əliyevin "2006-2010-cu illərdə Azərbaycan Respublikasında ekoloji vəziyyətin yaxşılaşdırılması üzrə Kompleks Tədbirlər Planı" haqqında imzaladığı sərəncamı çərçivəsində həyata keçirilir.
Baku White City layihəsi üzərində işlərə azərbaycanlı mütəxəssislərlə yanaşı "Atkins", "Foster + Рartners" (Böyük Britaniya) və "F+A Architects" (ABŞ) kimi məşhur şirkətlər də cəlb edilib.