Azərbaycan, Bakı, 12 aprel/Trend, müxbir E. İsmayılov/
Avropa İttifaqı (Aİ) enerji səmərəliliyinin təmin edilməsi sahəsində Azərbaycanla əməkdaşlığı davam etdirmək niyyətindədir. Trend-in məlumatına görə, bu barədə cümə axşamı Bakıda Alternativ və Bərpa Olunan Enerji Mənbələri üzrə Dövlət Agentliyində keçirilən mətbuat konfransında Avropa İttifaqının (Aİ) Azərbaycandakı nümayəndəliyinin rəhbəri Roland Kobia bildirib.
Mətbuat konfransı Avropa Komissiyasının enerji sahəsində islahatlar proqramına dəstək üçün 13 milyon avro həcmində qrantın istifadə edilməsi üzrə proqramın ikinci mərhələsinin başlamasına həsr edilib.
"Azərbaycanda alternativ enerjinin inkişafı üzrə böyük iş aparılır, lakin bununla yanaşı, enerji səmərəliliyinin inkişafı da aktualdır. Bu proqram alternativ enerji və enerji səmərəliliyi sahəsində əməkdaşlığın başa çatması deyil. Aİ gələcəkdə enerji səmərəliliyi sahəsində əməkdaşlığı davam etdirmək niyyətindədir", - Kobia deyib.
Səfirin sözlərinə görə, indiyədək Aİ proqramları çərçivəsində Azərbaycana altı milyon avro ayrılıb. Qalan vəsait ilin sonunadək ayrılacaq, bundan əvvəl isə Azərbaycan tərəfi proqram çərçivəsində nəzərdə tutulan tədbirləri yerinə yetirməlidir.
Proqram alternativ elektrik enerjisi mənbələrinin inkişafı üzrə fəaliyyət planının hazırlanmasını nəzərdə tutur. Həmçinin enerjidən istifadə edilməsinin səmərəliliyini artırmaq üçün qanunvericiliyin təkmilləşdirilməsi, bu sahədə dövlət maliyyəsinin idarə edilməsi sisteminin, enerji sektorunda statistikaların təkmilləşdirilməsi nəzərdə tutulur.
"Aİ Azərbaycanla alternativ və bərpa olunan enerji mənbələri sahəsində təcrübə və müasir texnologiyaları bölüşməyə hazırdır", - Kobia vurğulayıb.