Azərbaycan, Bakı, 17 sentyabr /Trend, müxbir E.İsmayılov/
Azərbaycan Respublikası Dövlət Neft Şirkəti (ARDNŞ) yüksək neft qiymətləri üzrə uzunmüddətli proqnozlara əsaslanmır. Trend-in məlumatına görə, bu barədə bazar ertəsi jurnalistlərə ARDNŞ prezidenti Rövnəq Abdullayev bildirib.
"Bir barel neftin qiymətinin 100 dollar civarında olması ARDNŞ və ümumilikdə respublika üçün daha münasibdir. Yüksək neft qiymətləri yaxşı göstərici deyil, çünki qiymətin artımı müvafiq olaraq neft məhsullarının dəyərinin bahalaşmasına gətirib çıxarır ki, bu da digər ölkələrin iqtisadiyyatına mənfi təsir göstərir", - Abdullayev deyib.
Onun sözlərinə görə, Azərbaycan iqtisadiyyatı stabildir və dünya bazarlarında böhran təzahürlərinin təsirinə məruz qalmayıb. Buna baxmayaraq, ölkə dünya iqtisadi məkanının bir hissəsidir və qonşu ölkələrdə mənfi iqtisadi vəziyyət bumeranq prinsipi üzrə Azərbaycana da təsir edə bilər.
"Buna görə də bizim uzunmüddətli proqnozlar neftin aşağı qiymətlərinə əsaslanır", - Abdullayev vurğulayıb.
Qeyd edək ki, 2013-cü il üçün makroiqtisadi proqnozlarda neftin qiyməti bir barelə görə 80 dollar səviyyəsində hesablanıb. Cari il üçün bu rəqəm 100 dollardır.