Azərbaycan, Bakı, 1 noyabr /Trend, müxbir E.İsmayılov/
Azərbaycan Respublikası Dövlət Neft Şirkətinin (ARDNŞ) öz zavodlarında təmizləyici qurğuların yenilənməsi üzrə apardığı işlər sənaye sularının dənizə atılmasını sıfıra endirəcək. Trend-in məlumatına görə, bu barədə cümə axşamı jurnalistlərə ARDNŞ prezidenti Rövnəq Abdullayev deyib.
Onun sözlərinə görə, bu nəticəni əldə etmək üçün şirkətin zavodlarında bioloji təmizləmə sahəsində müasir təmizləyici qurğuların quraşdırılması üzrə işlər görülüb.
Abdullayev qeyd edib ki, hazırda şirkət həmçinin, Suraxanı və Balaxanı kimi mədənlərdən lay sularının dənizə atılmasının dayandırılmasına dair işlər aparır.
Aparılan işlərə uyğun olaraq, gələn ildən lay sularının atılma həcmləri sıfır göstəricisinə çatdırılacaq.
Bu nəticə artıq "Bibiheybət" yatağında əldə edilib.
"Bütün bu işlər ARDNŞ-nin Bakı buxtasının təmizlənməsi prosesinə töhfəsidir", - Abdullayev bildirib.
