Azərbaycan, Bakı, 23 may /Trend, müxbir E.İsmayılov/
2014-cü il mayın 23-nə olan məlumata görə, Azərbaycan əhalisinə və digər istehlakçılara gündəlik verilən qazın həcmi 7,2 milyon kubmetr təşkil edir. Aprelin 22-nə olan məlumata görə isə bu göstərici 9,2 milyon kubmetr olub. Bu barədə cümə günü Trend-ə Azərbaycan Respublikası Dövlət Neft Şirkətinin (ARDNŞ) "Azəriqaz" İstehsalat Birliyindən (İB) deyiblər.
İB-dən bildiriblər ki, mayın 23-nə (ölkədə hava şəraitinin yaxşılaşması fonunda) Bakıda sutkalıq qaz istehlakı 4,6 milyon kubmetr olub: "Regionlar üzrə sutkalıq qaz istehlakının həcmi isə hazırda 2,6 milyon kubmetr təşkil edir".
Qaz istehlakının azalması yaz-yay mövsümü ilə əlaqədardır.
2014-cü il mayın 1-nə olan məlumata görə, "Azəriqaz"ın abonentlərinin sayı 1 688 805 nəfər təşkil edib. Qaz abonentlərinin ümumi sayından 714 611 abonent Bakının, 974 164-ü isə ölkənin digər regionlarının payına düşür. Qaz abonentlərinin böyük hissəsi əhali qrupunun, qalan hissəsi isə digər kateqoriyaların payına düşür.
