Azərbaycan, Bakı, 2 iyun /Trend, müxbir H.Vəliyev/
Azərbaycan Respublikası Dövlət Neft Şirkəti (ARDNŞ) və Rusiyanın "Rosneft" şirkəti mayda yaradılmış birgə müəssisə çərçivəsində Rusiya neftinin Bakı-Novorossiysk neft kəməri üzrə Azərbaycana nəqli, onun sonradan Bakı-Tbilisi-Ceyhan (BTC) neft kəməri üzrə emalı (qismən) və tədarükü məsələlərini nəzərdən keçirirlər. Bunu bazar ertəsi Trend-ə ARDNŞ prezidenti Rövnəq Abdullayev deyib.
Onun sözlərinə görə, hazırda üzərində iş aparılan infrastruktur layihələr var: "Söhbət Bakı-Novorossiysk neft kəmərindən gedir. Onun vasitəsilə neftin Bakıdakı neft emalı zavodlarına (NEZ) nəqli planlaşdırılır. Nəqlin illik həcmi ildə 5 milyon tonadək təşkil edir. Neftin bir hissəsini BTC boru kəməri ilə nəql etmək planlaşdırılır".
R.Abdullayev qeyd edib ki, neft-qazın kəşfiyyatı və hasilatı üzrə birgə müəssisə də Rusiya və Azərbaycan ərazisində layihələrin reallaşdırılması ilə məşğul olacaq: "Rosneft" dünyanın iri hasilat şirkətidir və Sibirdə, Arktikada və dünyanın digər regionlarında iri layhələr həyata keçirir".
O deyib ki, "Rosneft"in Azərbaycanda iştirak etmək niyyətində olduğu perspektivli layihələr mövcuddur: "Hazırda reallaşdırılması mümkün olan layihələr baxılma mərhələsindədir. "Rosneft" Abşeronun neft-qaz ehtiyatlarının tədqiqində iştirak etmək istəyir".
ARDNŞ prezidenti vurğulayıb ki, birgə müəssisədə Azərbaycan və Rusiya tərəfinin iştirak payı 50/50-dir: "ARDNŞ milyardlarla ton ehtiyatın olduğu Sibirdə iri layihələrdə iştirak etməyə maraq göstərir. Burada hələ layihələr reallaşdırılmır".
Qeyd edək ki, birgə müəssisənin yaradılması haqqında saziş mayın 24-də Sankt-Peterburq İqtisadi Forumunda imzalanıb.