Azərbaycan, Bakı, 6 iyun /Trend, müxbir E.İsmayılov/
Azərbaycan Respublikası Dövlət Neft Şirkətinin (ARDNŞ) "Azəriqaz" İstehsalat Birliyi müstəqil şəkildə Bakının qazpaylayıcı sisteminin tam yenidən qurulması və modernləşdirilməsi layihəsinin ətraflı mühəndislik işlərini aparır. Bunu cümə günü Trend-ə ARDNŞ-dəki mənbə deyib.
Mənbə qeyd edib ki, gələn ilə bu layihənin ətraflı mühəndislik işləri yekunlaşacaq.
O, layihənin reallaşdırılmasının tarixini açıqlamayıb: "Layihə ümumilikdə 1,2 milyard avro həcmində investisiya tələb edə bilər və onu tam olaraq xarici borcların cəlb edilməsi hesabına reallaşdırmaq planlaşdırılır. İşlərə başladıqdan sonra yenidənqurma prosesi ən azı 3 il çəkəcək".
Qeyd edək ki, daha əvvəl Almaniyanın E.ON şirkəti Bakının və Abşeron yarımadasının qazpaylayıcı sisteminin tam yenidən qurulması və modernləşdirilməsi layihəsinin texniki iqtisadi əsaslandırmasını (TİƏ) hazırlayaraq ARDNŞ-yə təqdim etmişdi.