Azərbaycan, Bakı, 21 noyabr /Trend, müxbir Emil İsmayılov/
2014-cü ilin yanvar-sentyabr aylarında Cənubi Qafqaz boru kəməri (Bakı-Tbilisi-Ərzurum) üzrə əsaslı xərclər 599 milyon dollar olub. Bu rəqəm ötən ilin analoji dövründə 9 milyon dollar təşkil edib. Hesabat dövründə əməliyyat xərcləri isə 36,5 milyon dollar təşkil edib.
Trend-in məlumatına görə, bu barədə BP-nin 2014-cü ilin yanvar-sentyabr ayları üzrə hesabatında deyilir.
Cənubi Qafqaz boru kəmərinin genişləndirilməsi ilə əlaqədar 2014-cü ildə əsaslı xərclər 1,25 milyard dollar olacaq. Bu göstərici 2013-cü ildə isə 250 milyon dollar olub.
2014-cü ilin 9 ayı ərzində Cənubi Qafqaz boru kəmərinin gündəlik orta ötürücülüyü 17,412 min kubmetr (təqribən 615 milyon kubfut) qaz və ya gündə 106 017 barel neft ekvivalenti olub.
Cənubi Qafqaz boru kəmərinin genişləndirilməsi çərçivəsində yaxın bir neçə həftə ərzində ilk boru partiyasının Azərbaycana gətirilməsi planlaşdırılır.
CQBK üzrə 2014-cü il üçün əməliyyat xərclərinin planlaşdırılan həcmi 47,2 milyon dollar təşkil edir. Bakı-Tbilisi-Ərzurum boru kəmərinin uzunluğu 700 kilometrdən çoxdur. Bu boru kəməri ilə Xəzərin Azərbaycan sektorundakı "Şahdəniz" qaz-kondensat yatağında hasil edilən qaz nəql olunur. Qaz Gürcüstan və Türkiyəyə tədarük olunur. Azərbaycan da qaz alıcısı qismində çıxış edir.
Cənubi Qafqaz boru kəməri üzrə sərmayədarlar bunlardır: BP (texniki operator - 28,8%), AzCQBK (10%), Cənub Qaz Dəhlizi Midstrim (6,7%), Statoyl (15,5%), LUKOYL (10%), NİKO (10%), və TPAO (19%). Bu faizlərə "Statoy"ldan müvafiq olaraq BP və Azərbaycan hökumətinin (Cənub Qaz Dəhlizi Midstrim) aldığı iştirak payları və "Total"ın TPAO-ya satdığı iştirak payı daxildir.