Azərbaycan Dövlət Neft Şirkəti və Azərbaycan Beynəlxalq Əməliyyat Şirkəti arasında Azərbaycan tərəfin 2006-cı ildə "Azəri-Çıraq-Günəşli" layihəsi çərçivəsində vəsait ödəmədən alacağı səmt qazının həcmi ilə bağlı razılıq əldə olunub.
AR DNŞ rəhbəri Rövnəq Abdullayevin Trend ə verdiyi məlumata görə, gələn il ölkə ABƏŞ-dən 3 mlrd m3 səmt qazı alacaq ki, bu da nəzərdə tutulandan 1,6 mlrd m3 çoxdur.
İrandan 1 mlrd m3 təbii qazın idxalı ilə bağlı planlara gəldikdə, R.Abdullayev qeyd edib ki, hökumət respublikanın energetika təhlükəsizliyinin təmin olunması üzrə müxtəlif variantları nəzərdən keçirir. "Hazırda İran qazının idxalı layihədir və o qədər də müzakirə olunmur", - deyə AR DNŞ rəhbəri bildirib.
Bakı-Tiflis-Ceyhan neft kəmərinin istismar müddəti məsələsi ilə bağlı R.Abdullayev qeyd edib ki, texniki çətinliklərin səbəb olduğu ləngimələr aradan qaldırılıb. "Neft kəmərinin istismara verilməsi aprel-may aylarında planlaşdırılır", - deyə o əlavə edib.
