Azərbaycan Dövlət Neft şirkəti (AR DNŞ) və Eurasia Energy Limited (keçmiş Pacific Alliance Ientures Ltd.) qarşılıqlı anlaşma haqqında memorandum imzalayıb. Bu memorandum Şotlandiya şirkətinə neft-qaz "Blok"unda (600 kv.km) kəşfiyyat işləri aparmaq, onun reabilitasiyası və işlənib-hazırlanması üzrə danışıqlar aparmaq üçün eksklüziv hüquqlar verir. Trend in xəbər verdiyi kimi, bu barədə Eurasia Energy Limited şirkətinin məlumatında bildirilir.
Sənəddə qeyd olunur ki, "Blok" "Ələt-Dəniz" yatağı və "Hamamdağ-Dəniz", "Qarasu", "Səngi-Muğan", "Ülfət", "Aran-Dəniz", "Daşlı" və "Səbail" kimi 7 əlavə yataqdan ibarətdir.
Yaxın vaxtlarda Eurasia Energy Limited şirkətinin texniki qrupu, geoloqlar, məsləhətçilər və digər mütəxəssislər "Blok" haqqında müxtəlif məlumatları öyrənəcək, onun gələcəkdə PSA müqaviləsi əsasında işlənməsi planını işləyib-hazırlamaqda şirkətin menecmentinə kömək edəcək.
"Blok"da suyun dərinliyi 20 metrdir və onun səviyyəsi strukturun sonuna kimi 50 m-ə çatır. "Ələt-Dəniz" 1983-cü ildə açılıb və indiyə kimi bu yataqdan 12,5 mln barel neft və 1 mlrd m3 qaz hasil edilib. AR DNŞ-in məlumatına görə, burada çıxarıla bilən neft ehtiyatı 14 mln barel, qaz ehtiyatı isə 1 mlrd m3 təşkil edir. Əsas məhsuldar laylar 3700-4500 m dərinlikdə yerləşir.