Azərbaycan neftin Bakı-Tiflis-Ceyhan boru kəməri ilə İsrail ərazisindən Qırmızı dənizə nəqli imkanlarının öyrənilməsi üzrə işçi qrupunun yaradılmasını təklif edib. Bu barədə Trend ə Azərbaycanın energetika və sənaye naziri Natiq Əliyev məlumat verib.
Onun sözlərinə görə, İsrailin infrastruktur nazirinin Azərbaycana səfəri zamanı BTC boru kəməri marşrutunun Aralıq dənizi ilə İsrailin Aşkelon şəhərinədək uzadılması təklif olunub. Neft buradan mövcud boru kəməri ilə Elat şəhərinədək nəql oluna bilər.
"İsrail hesab edir ki, bu, çox sərfəli sistem ola bilər. Çünki Qırmızı dənizdən Çin, Hindistan və Cənub-Şərqi Asiyanın digər ölkələrinə yol açılır", - deyə N.Əliyev qeyd edib. Nazirin sözlərinə görə, hazırda neftin nəqli üzrə müxtəlif marşrutlar mövcuddur. Ancaq bunlardan istifadə üçün iqtisadi əlverişlilik nəzərə alınmalı və layihələrin texniki-iqtisadi əsaslandırılmaları hazırlanmalıdır.
