Azərbaycan Dövlət Neft Şirkəti dəniz neft əməliyyatlarına yardım etmək üçün yeni gəmilər almaq fikrindədir. Bu barədə Trend ə ARDNŞ-dən məlumat verilib.
Hazırda ARDNŞ-in bəzi gəmiləri köhnəlib, nəticədə şirkət dəniz əməliyyatlarında bəzi mövqelərini itirib. Həmin dəniz əməliyyatları üzrə şirkət hər zaman ilk sıralardan birini tuturdu.
Azərbaycan Dövlət Neft Şirkətinin neft-qaz əməliyyatlarını dəstəkləyən "Xəzərdənizneftdonanma" idarəsi müxtəlif tipli 10 yeni gəminin tikintisi üzrə texniki tapşırıq hazırlayıb. Həmin proses "2005-2015-ci illər üçün Azərbaycanın yanacaq-energetika kompleksinin inkişafı" dövlət proqramının reallaşdırılması çərçivəsində həyata keçirilir.
Bundan əlavə, ARDNŞ dəniz neft-qaz əməliyyatlarının dəstəklənməsində istifadə olunan "Qurban Abbasov" kran gəmisinin təmiri və müasirləşdirilməsi üzrə işlərə başlayıb. Bu gəmi 600 ton yükü qaldırmağa qadirdir. Gəmi 14 il bundan əvvəl təmirə qoyulub. Lakin birbaşa işlərə yalnız bu il başlanılıb.
Hazırda istehsalat birliyi 186 gəmidən istifadə edir. Onlardan 20-si "Azəri"-"Çıraq"-"Günəşli" yataqlarının işlənmə layihəsi çərçivəsində fəaliyyət göstərir.