"Qərbi Abşeron" strukturunun cənub hissəsində yeni qazma nöqtəsində yerləşdirilmiş "Abşeron" qazma qurğusu birinci quyunu qazmağa başlayıb. Bu barədə Trend ə Azərbaycan Dövlət Neft Şirkətindən məlumat verilib. Yeni qazma nöqtəsi əvvəlkindən 1600 metr kənarda yerləşir. Həmin nöqtədə 5 istismar quyusunun qazılması nəzərdə tutulub.
Hal-hazırda yatağın bu hissəsində qazma işləri "Xəzər" qazma quruğusu vasitəsi ilə həyata keçirilir. Qurğu yataqda artıq ikinci quyunu qazır. Quyunun layihə dərinliyi 820 metrdir. Hazırda quyu dibi 445 metr dərinlikdədir. Həmin qurğu vasitəsi ilə cəmi 5 qabaqlayıcı quyunun qazılması nəzərdə tutulub. Onlar qazıldıqdan sonra platformadan növbəti hasilat üçün bağlanacaq.
ARDNŞ-də hesab edirlər ki, açıq yataq işlənilmə üçün əlverişlidir. Bu, yatağın sahilə, eləcə də neft nəqli üzrə mövcud kommunikasiyalara yaxın yerləşməsi ilə izah olunur. Hal-hazırda yatağın bu hissəsində konturlama işləri və ehtiyatların qiymətləndirilməsi aparılır. Quyuların dərinliyi 800 -1000 metr təşkil edir.
ARDNŞ "Qərbi Abşeron" yatağının cənub hissəsində hasilat platformasını quraşdırmaq niyyətindədir. Platfolrma sahildən 40-50 metr aralıda, sahilyanı zonada quraşdırılacaq. Mütəxəssislərin hesablamalarına görə, yataqda 1,5 mln. tona yaxın şərti yanacaq ehtiyatı var.
