Noyabrın 3-də Bakıda ARDNŞ və Rusiyanın "RusHeft" şirkəti arasında "Hövsan"-"Zığ" yataqlarının Azərbaycana məxsus quru blokunun birgə işlənməsi haqqında PSA tipli saziş imzalanacaq. Bu barədə Trend ə ARDNŞ-dən məlumat verilib.
Bundan əvvəl "Hövsan"-"Zığ" yataqlarının işlənməsi haqqında müqavilə Rusiyanın "LUKOYL" şirkəti ilə bağlanmışdı. Ancaq bu şirkət ekololoji məsələlərlə əlaqədar müqaviləni pozub.
"Zığ" yatağının uzunluğu 3,25 km, eni - 1,75 km-dir. Abşeron yarımadasındakı yatağın məhsuldar laylarının dərinliyi 1470-2800 metr təşkil edir. Yataq 1935-ci ildən istismar olunur.
"Hövsan" yatağı Hövsan qəsəbəsində, Bakıdan 20 km şərqdə yerləşir. Yatağın uzunluğu - 6 km, eni - 5 km-dir. 1947-ci ildən istismar olunan yataq qərb və şərq sahələrdən ibarətdir.
"RusHeft" MŞ ASC 2002-ci ilin sentyabrında yaradılıb. Bu gün şirkətin illik neft hasilatı 17 mln. tondan, çıxarıla bilən ehtiyatları isə 630 mln. tondan çox təşkil edir. "RusHeft" şirkətinin balansında 30 hasilat aktivi, 3 neft emalı zavodu, 1 nəqliyyat müəssisəsi və 300 yanacaq doldurma kompleksi var.