"Şahdəniz" qaz-kondensat yatağının işlənmə layihəsi üzrə Azərbaycan qaz hasilatının başlanması ilə bağlı xarici tərəfdaşlardan bonus şəklində 45 mln. ABŞ dolları alacaq. Trend xəbər verir ki, bu barədə bu gün jurnalistlərə Azərbaycan Dövlət Neft Fondunun (ARDNF) icraçı direktoru Şahmar Mövsümov məlumat verib.
Onun sözlərinə görə, "Şahdəniz"dəki ilk qaz 1 trln. kubmetr ehtiyatla noyabrın 10-da əldə olunub və müqaviləyə görə xarici tərəfdaşlar bu günlərdə ARDNF-ə müvafiq bonus verəcəklər.
Ş.Mövsümov qeyd edib ki, 2007-ci ildə Neft fondu Yalama Xəzər layihəsi üzrə (D-222) Rusiyanın LUKOYL şirkətindən 17,2 mln. manat (20 mln. ABŞ dollarından çox), eləcə də Hövsan-Zığ quru yataqları üzrə neft müqaviləsinin imzalanması ilə bağlı "RussNeft" şirkətindən bonus (bonusun məbləği dəqiqləşdirilir) almalıdır.
ARDNF 1999-cu ildə yaradılıb və onun vəzifəsi beynəlxalq neft-qaz sazişlərinin reallaşdırılmasından Azərbaycan hökümətinin gəlirlərini toplamaqdan ibarətdir. ARDNF-in başlıca xərcləri arasında Ermənistanın-Azərbaycan, Dağlıq Qarabağ münaqişəsi nəticəsində zərər çəkmiş qaçqın və məcburi köçkünlərin sosial şəraitlərinin yaxşılaşdırılması, eləcə də strateji infrastruktur layihələrinin maliyyələşdirilməsi də var.