Azərbaycan Dövlət Neft Şirkəti (ARDNŞ) öz qaz hasilatının artırılması üzrə yeni proqramı reallaşdırmağa başlayıb. O cümlədən, "Günəşli" yatağının dayaz hissəsində yerləşən "Günəşli-8" platformasından qazıntı başlayıb. Quyunun dərinliyi 2600 metr təşkil edəcək. Bu barədə Trend ə cümə günü ARDNŞ-dən məlumat verilib.
Bu il ARDNŞ "Günəşli" yatağında 8№-li platformadan - 4 qaz quyusu, 13№-li platformadan - 7 qaz quyusu, 14№-li platformadan - 4 qaz quyusu, 19№-li platformadan - 2 qaz quyusu, 15№-li platformadan - 2 qaz quyusu, 3№-li platformadan - 2 qaz quyusu, 11№-li platformadan - 2 qaz quyusu qazmaq niyyətindədir.
Bu proqramın reallaşdırılması nəticəsində 2007-ci ildə ARDNŞ-in qazının təhvil həcmi 5 mlrd. kub metr qaza qədər artırılacaq. 2008-ci ildə təhvil həcmi 8 mlrd. kub metrə qədər artırılacaq.
ARDNŞ 2006-cı ilin sonunda öz yataqlarında qaz hasilatının artırılması üzrə yeni proqramı təsdiq edib. Bu proqramın reallaşdırılması nəticəsində ümumi qaz hasilatı 2007-ci ilin sonu- 2008-ci ilin əvvəlinə qədər 3-3,5 mlrd. kub metr artırılacaq. Bu, Azərbaycanın qaza olan tələbatını tamamilə ödəməyə və hətta onun ixracını həyata keçirməyə imkan verəcək.
Qaz hasilatı həcminin "Günəşli", "Bulla-dəniz", "8 Mart", "Bahar" yataqlarında yeni qaz quyularının qazılması, yeni boru kəmərlərinin inşası və bir sıra digər işlərin hesabına artırılması nəzərdə tutulub.
