Azərbaycan,Bakı/müxbir Trend S.Əliyev/Azərbaycanın Xəzər sahəsində perspektivli "İnam" strukturunda ikinci INX-2 kəşfiyyat quyusunun qazılmasına hazırlıq sentyabrda başlayacaq. Quyunun qazılmasına ilin əvvəlində başlamaq planlaşdırılır. Bu barədə çərşənbə axşamı Azərbaycan Dövlət Neft Şirkətindən məlumat verilib (ADNŞ).
"İnam" yatağı üzrə müqavilə çərçivəsində (layihə operotoru olan BP-nin payı 25 faiz, ADNŞ-in 50 faiz və Shell - 25 faiz) INX-2 quyusunun qazılmasında "İstiqlal" qazma qurğusu istifadə olunacaq.
ADNŞ nümayəndəsinin sözlərinə görə, qazma işlərinin bilavasitə başlanması müddəti "Şahdəniz" yatağında qiymətləndirici SDX quyusunda yan gövdənin qazılması və əldə olunmuş məlumatların təhlili ilə bağlı "İstiqlal" qurğusunun istismarının başa çatması müddətindən asılı olacaq.
"İstiqlal" qurğusunu Azərbaycan-Amerika BM olan Caspian Drilling Company (CDC) (ADNŞ və Global Santa Fe) idarə edir.
