Azərbaycan, Bakı /müx. Trend V.Şərifov/ Azərbaycanın "Şahdəniz" qaz-kondensat yatağının işlənməsi üzrə "Mərhələ-2" layihəsinin reallaşacağı tarix 2013-cü ilə təyin edilib. "Statoil Azerbaijan"ın vitse-prezidenti Yan Heiberqin cümə axşamı verdiyi məlumata görə, "Mərhələ-2" layihəsi çərçivəsində hər il yataqdan 12 mlrd. kubmetr qaz ixrac etmək nəzərdə tutulur.
"Mərhələ -2" layihəsi ilə bağlı bizim çox ambisiyalı planlarımız var. Biz onu bacardığımız qədər tez reallaşdırmağa çalışırıq" - deyə o bildirib.
"Mərhələ-1" layihəsində olduğu kimi, "Mərhələ-2" layihəsi də Cənubi Qafqaz qaz kəməri üzrə həyata keçiriləcək. "Statoil Azerbaijan" "Şahdəniz" yatağının kommersiya operatoru və "Mərhələ-1" layihəsinə qaz çatdırılması ilə məşğul olan Azərbaycan şirkətinin (AGSC) rəhbəridir.
Onun sözlərinə görə, hazırda SCP kəmərinin gücü bir il üçün 9 mlrd. kubmetr qaz təşkil edir. Beş nasos stansiyasının tikilməsi hesabına SCP-nin ötürmə gücü 20 mlrd. kubmetrə qədər artırıla bilər.
"SCP kəmərinin genişləndirilməsi "Mərhələ-2" layihəsində böyük əhəmiyyət daşıyır" - deyə o bildirib.
"Mərhələ-2" layihəsində qazın satış bazarına gəldikdə isə Heiberq bildirib ki, Azərbaycan qazını alacaq potensial ölkələrə Avstriya, İtaliya, Almaniya, Polşa, Türkiyə, Gürcüstan və Azərbaycan daxildir.
"Azərbaycan "Şahdəniz" yatağından qaz alınacağı təqdirdə səmərəli kommersiya şərtləri təklif edir. Hazırda ölkə qaz hasilatını artırır və bununla əlaqədar olaraq ölkənin qaza olan tələbatını müfəssəl müzakirə etmək lazımdır" - deyə o qeyd edib.
Azərbaycanda ARDNŞ-ə qaz hasilatını 8 mlrd. kubmetrə qədər artırmağa imkan verəcək qaz proqramı qəbul olunub. Bundan başqa, "Azəri-Çıraq-Günəşli" yatağının dərin hissələrində yerləşən qazın işlənməsi perspektivləri var. Bu yatağın işlənməsi ilə bağlı operator "BP" şirkətidir, yatağın qaz resurslarının işlənməsi isə digər bir müqavilənin mövzusudur.
