Azərbaycan, Bakı/ Trend müxbir S.Əliyev/ Azərbaycan Dövlət Neft Şirkətinin "Neftqaztikinti" tresti 2007-ci ilin sonuna qədər Gürcüstanda Şimal-Cənub marşrutu üzrə 33,5 kilometrlik Qardanabi-Navtluqi boru kəməri hissəsini istismara verəcək. Bu barədə ARDNŞ-dən məlumat verilib. ARDNŞ-dən bildiriblər ki, trest tenderin qalibi olub və layihənin dəyəri 11,2 mln. dollar həcmində qiymətləndirilir.
Hazırda trest tikinti işlərinə başlayıb. 7,7 km. ərazidə borular qaynaq edilib, 10 kilometr sahədə borular düzülüb və 12,3 km. ərazidə torpaq işləri görülür. Qaz kəməri hissəsinin çəkilməsi köhnə qazpaylayıcı şəbəkənin sxem strukturunun bərpa olunmasına imkan verəcək.
Layihə çərçivəsində 700 millimetr diametrində yeni boru kəməri çəkiləcək.
Azərbaycan tikinti şirkəti Gürcüstanda bir neçə layihə həyata keçirir. Şirkət artıq "Minilliyin çağırışı - Gürcüstan" layihəsi hesabına maliyyələşdirilən magistral qaz kəmərinin şimal hissəsində 4 sahənin reabilitasiyasını həyata keçirib.
