Bakı. Trend:
Bu il Bakıda keçiriləcək COP29-a hazırlıq çərçivəsində “Qaz İxrac edən Ölkələr Forumu” (GECF) yüksək səviyyəli virtual görüş təşkil edib.
Trend bu barədə GECF-ə istinadən xəbər verir.
Görüş GECF-ə üzv dövlətlərə əsas iqlim məsələləri üzrə mövqelərini razılaşdırmaq və qarşıdan gələn BMT-nin İqlim Dəyişikliyi Konfransında iştirak strategiyasını hazırlamaq üçün platforma təqdim edib.
Sessiyanı açan Qaz İxrac Edən Ölkələr Forumunun baş katibi (GECF) Mohamed Hamel təbii qazın dünya enerji tələbatının ödənilməsində və iqlim məqsədlərinə çatmaqda mühüm rol oynadığını vurğulayıb. O, təbii qazı təmiz, çevik və etibarlı enerji mənbəyi kimi qeyd edərək, onun həm enerji təhlükəsizliyi, həm də davamlı inkişaf üçün vacib element olduğunu bildirib. Mohamed Hamel, həmçinin təbii qazı bərpa olunan enerji mənbələri ilə inteqrasiya edərək, Azərbaycanın davamlı enerji keçidini təşviq etməkdəki liderliyini yüksək qiymətləndirib.
Xüsusilə, iştirakçılar son iqlim tədbirləri ilə bağlı irəliləyişləri nəzərdən keçirib və itkilərin qarşısının alınması, uyğunlaşma tədbirləri və zərər məsələlərini həll etməyə dair strategiyalara diqqət yetiriblər.
İqlim maliyyələşdirilməsi diqqət mərkəzində olub, COP29-un prioritet mövzularından biri olan Yeni Kollektiv Kəmiyyət Məqsədi və qlobal iqlim təşəbbüslərini dəstəkləmək üçün yeni maliyyə öhdəliklərinin vacibliyi müzakirə edilib.
Sessiya, GECF-in COP29-da fəal iştirak planlarının, o cümlədən nazir səviyyəsində görüşlərin keçirilməsi, paralel tədbirlər və ayrıca pavilyonun təşkili məsələlərinin müzakirəsi ilə başa çatıb. GECF qlobal enerji və iqlim məsələləri üzrə müzakirələrin təşviqinə sadiqliyini bir daha təsdiqləyib və inkişaf ehtiyacları ilə iqlim dəyişikliyinə qarşı tədbirləri balanslaşdıran davamlı enerji həllərinə önəm verdiyini vurğulayıb.
Bu görüş GECF-in COP29-da qlobal enerji və iqlim məsələlərinə dair müzakirələrdə fəal rol oynayacağının əsasını qoyub.
Qeyd edək ki, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) bu ilin noyabrında Azərbaycanda keçiriləcək. Bununla bağlı qərar ötən il dekabrın 11-də Dubayda keçirilən COP28 plenar iclasında qəbul edilib. İki həftə ərzində dünyanın mərkəzinə çevrilən Bakı 70-80 minə yaxın xarici qonaq qəbul edəcək.
Birləşmiş Millətlər Təşkilatının İqlim Dəyişmələri üzrə Çərçivə Konvensiyası 1992-ci ilin iyununda Rio-de-Janeyroda keçirilən Yer Sammitində insanın iqlim sisteminə təhlükəli müdaxiləsinin qarşısını almaq üçün imzalanmış sazişdir. "COP" (Conference of Parties) abbreviaturası İqlim Dəyişikliyi üzrə Çərçivə Konvensiyasının icrasına nəzarət edən ən yüksək qanunverici orqan olan "Tərəflərin Konfransı" mənasını verir.
Konvensiyada 198 ölkə iştirak edir. Tərəflər başqa cür razılaşmırsa, COP hər il keçirilir. İlk COP tədbiri 1995-ci ilin martında Berlində baş tutdu və onun katibliyi Bonnda yerləşir.
X: @Lyaman_Zeyn