Azərbaycan, Bakı / Trend , müxbir S.Babayeva/ Naxçıvan Muxtar Respublikasında (NMR) yanvar-noyabr ayları ərzində 4,4 mindən çox ailə telefon nömrəsi əldə edib. Bu barədə çərşənbə günü NMR-in Bakıdakı daimi nümayəndəliyindən məlumat verilib.
Bu dövr ərzində Muxtar Respublikanın Rabitə və İnformasiya Texnologiyaları Nazirliyi tərəfindən 4447 ədəd telefon xətti çəkilib. Bu göstərici 2006-cı ilin analoji dövrü ilə müqayisədə 1263 ədəd və ya 39,7 faiz çoxdur.
Ümumilikdə NMR ərazisində rabitə sahəsində müəssisə və təşkilatlara, o cümlədən əhaliyə 50,1 faiz artımla 14,4 mln. manat civarında xidmət göstərilib. Göstərilən xidmətlərdən 78,5 faiz və ya 11,3 mln. manat özəl şirkətlərin payına düşüb. Bu sahədə artım 55,8 faiz təşkil edib.
Göstərilən dövr ərzində NMR-in rabitə müəssisələrində işçilərin sayı 824 nəfər təşkil edib ki, bu da 2006-cı ilin analoji dövr göstəricisindən 1,1 faiz çoxdur. Orta aylıq əmək haqqı 25,1 faiz artaraq 138,5 manat təşkil edib.
Muxtar Respublika Azərbaycanın qərb hissəsində yerləşir. O, şimal və şərqdən Ermənistan, cənubdan və qərbdən isə Türkiyə və İranla həmsərhəddir. NMR-in ümumi sahəsi 5,5 min km2-dir. Əhalisinin sayı 360 min nəfərdən çoxdur. Muxtar Respublikanın paytaxtı Naxçıvan şəhəridir.
