Azərbaycan, Bakı, 07 fevral/ Trend / "Microsoft" korporasiyası Azərbaycanda regional elektron informasiya mərkəzi yarada bilər. Rabitə naziri Əli Abbasovun "Rabitə Dünyası" (Azərbaycanın Rabitə və İnformasiya Texnologiyaları Nazirliyinin qəzeti) qəzetinə verdiyi müsahibədə "Microsoft"un Mərkəzi Asiya regionunda, keçmiş sovet ölkələri məkanında və Yaxın Şərqdə regional mərkəzin açılması işində Azərbaycanı etibarlı tərəfdaş kimi qiymətləndirdiyini bildirib.
"Bu planlar bir qədər əvvəl Davosda keçirilən dünya iqtisadi forumunda Azərbayan prezidenti İlham Əliyevin "Microsoft" rəhbərliyi ilə görüşü zamanı müzakirə edilib" - nazir bildirib.
Nazirin sözlərinə görə, görüşün yekunlarına görə, şərtləri müəyyən etmək və bu məsələ üzrə İşçi qrup yaratmaq qərara alınıb.
Tərəflər yazda Azərbaycan hökuməti ilə "Microsoft" arasında strateji əməkdaşlıq haqqında sazişin imzalanması məsələsini müzakirə ediblər. Sazişdə Azərbaycanda intellektual mülkiyyətin müdafiəsi, proqram təminatının qanuniləşdirilməsi və "Microsoft"un Azərbaycanda investisiya layihələrinin reallaşdırılması öz əksini tapıb.
