Azərbaycan, Bakı, 02 sentyabr/ Trend , müxbir S.Babayeva, İ.Xəlilova/ Azərbaycanın mobil rabitə operatorları üçüncü nəsil 3G rabitə xidmətlərinin tətbiqinin məqsədəuyğunluğunu müəyyən etmək üçün bazarı öyrənirlər, - Azərbaycanın rabitə və informasiya texnologiyaları naziri Əli Abbasov çərşənbə axşamı bildirib.
"Onlar (operatorlar) biznes-planın hazırlanması üzrə iş aparır və bazarı öyrənirlər. Belə ki, bu növ layihələr böyük xərc tələb edir", - o bildirib.
Abbasov ilin sonunadək operatorlardan 3G tezliklərindən istifadəyə dair konkret təkliflərin daxil olacağını proqnozlaşdırır.
Azərbaycanda dörd mobil rabitə operatoru fəaliyyət göstərir. Onlardan üçü - Azercell Telecom, Bakcell və Azerfon GSM, biri - Catel CDMA standartı üzrə fəaliyyət göstərir. Ölkədə mobil rabitə abunəçilərinin ümumi sayı təqribən 5 mln. nəfər təşkil edir.
Əvvəllər hər üç GSM operator ölkədə 3G xidmətləri göstərmək arzusunu bildiriblər.
Tezliklər razılaşdırıldıqdan sonra, radiotezliklər üzrə dövlət komissiyası tərəfindən rəsmi olaraq ayrılacaqlar.
3G standartı Beynəlxalq Rabitə İttifaqı tərəfindən hazırlanıb və IMT-2000 (International Mobile Telecommunications 2000) adını daşıyır. 3G - "üçüncü nəsil" İnternet şəbəkəsinin xidmətləri ilə yüksəksürətli mobil çıxış və məlumatın ötürülməsi kanalları yaradan radiorabitə texnologiyasını özündə birləşdirir. 3G üçüncü nəsil şəbəkələri məlumatları 2Mbit/s sürətlə göndərərək, təqribən 2GHz diapazonlu tezliklərdə işləyirlər. Onlar videotelefoniya təşkil etmək, mobil telefonda film və teleproqramlara baxmağa imkan yaradırlar.
