Azərbaycan, Bakı, 26 noyabr/ Trend , müxbir S.Babayeva/ Yaxın 5 -10 ildə Azərbaycanda informasiya-kommunikasiya texnologiyaları sahəsinin inkişaf perpsektivləri son dərəcə sevindiricidir, - Azərbaycan əsilli məşhur alim, riyaziyyatçı, Kaliforniya universitetinin (Berkli) professoru Lütfi Zadə (Lutfi Zadeh) hesab edir.
"Azərbaycanda neft satışından gələn gəlir, mədəniyyət, sovet vaxtlarından irsən keçmiş müsbət təcrübə var - bütün bunlar müsbət göstəricilərdir. Mən nikbinəm və Azərbaycanın gözəl gələcəyinə inanıram", - Lütfi Zadə bildirib.
Əvvəllər Lütfi Zadə Azərbaycanda tərkibinə kiçik sayda ekspertlərin - sənaye sahələri, ali təhsil müəssisələri və nəinki Azərbaycan, həm də qonşu ölkələrin - məsələn, Türkiyə və Rusiyanın elmi-tədqiqat institutlarının nümayəndələrinin daxil ola biləcəyi elmi-texnoloji tədqiqatlar və işləmələr regional mərkəzini yaratmağı tövsiyə edib.
Alimin rəyinə görə, təhsil sahəsini informasiya texnologiyaları istiqamətində möhkəmləndirmək, alim və professorların xarici ölkələrdəki elmi-tədqiqat institutları və universitetlərinə səfərlərini təşkil etmək, nanotexnologiyalar üzrə mühazirələr oxumaq lazımdır.
İnformasiya texnologiyalarının inkişafında nanotexnologiyaların əhəmiyyətli rolunu nəzərə alaraq, Azərbaycanın Nazirlər Kabinetinin sərəncamı ilə Yüksək Texnologiyalar üzrə Tədqiqat Mərkəzi yaradılıb.
Hazırda Azərbaycanın Rabitə Nazirliyi sentyabrda təsis edilmiş Yüksək Texnologiyalar üzrə Tədqiqat Mərkəzi üçün sənədlərin hazırlanmasının (layihənin Nizamnaməsi, strukturu və ştat cədvəli üzrə təkliflərin işlənilməsi) üzərində işləyir, - dövlət idarəsindən bildiriblər. Mərkəz büdcə vəsaitləri hesabına maliyyələşdiriləcəyi üçün, sənədlər hazırlandıqdan sonra Maliyyə Nazirliyi ilə razılaşdırılmalı, sonra isə, nəzərdən keçirilmək üçün hökumətə təqdim edilməlidir.