Azərbaycan, Bakı, 19 mart / Trend , müxbir E.İsmayılov, A. Bədəlova /
Beynəlxalq Elektron Rabitə İttifaqı (ITU) Azərbaycan peykinin orbitə buraxılması üçün üçüncü orbital pozisiya ayırıb. Bu barədə Azərbaycanın rabitə və informasiya texnologiyaları naziri Əli Abbasov bildirib.
"Beynəlxalq Elektron Rabitə İttifaqı Azərbaycan üçün əvvəlcə iki orbital pozisiya ayırmışdı, artıq üçüncü beynəlxalq pozisiya da ayrılıb", - deyə Abbasov bildirib.
Beynəlxalq Elektron Rabitə İttifaqı artıq Azərbaycan üçün ölkədə yayımı təmin edəcək iki orbital pozisiya ayırıb. Buna baxmayaraq plandan kənar pozisiyanın effektivliyi nəzərə alınaraq bu tipli pozisiyanın 20 illik icarəyə götürülməsi üçün müqavilə imzalanıb.
AzerSpace peykinin buraxılması ilə bağlı layihə 200 milyon dollar dəyərində qiymətləndirilir. Nazirliyin proqnozuna əsasən, layihənin özünü maliyyələşdirməsi onun orbitə buraxılmasından 5 il sonra baş tutacaq, təxminən 15 ildən sonra isə layihə Azərbaycana xeyli gəlir gətirəcək. Həmçinin Azərbaycanın ikinci peykinin yaradılması və orbitə buraxılması nəzərdə tutulub.
Dünya təcrübəsində peyklərin istehsalı iki ilə, onun buraxılması bir neçə aya başa gəlir.
Azərbaycan Prezidenti İlham Əliyev 2008-ci ilin noyabrında ölkədə kosmik sənayenin yaradılması və orbitə telekommunikasiya peyklərinin buraxılması barədə sərəncam imzalayıb. Sənəddə qeyd olunur ki, Azərbaycanın Avropa və Asiya arasında əlverişli coğrafi və iqtisadi məkanda yerləşməsi ölkənin iqtisadi və informasiya təhlükəsizliyi üçün əsas komponenti olan telekommunikasiya peyklərinin yaradılması və onların orbitə braxılmasını zəruri edir.
Məqalə müəllifi ilə əlaqə ünvanı: [email protected]