Azərbaycan, Bakı, 30 iyul / Trend , müxbir H. Vəliyev /
Paytaxt yollarında qəzaların azaldılması məqsədilə Azərbaycan Nəqliyyat Nazirliyi 2011-ci ilin sonuna kimi yol hərəkətinin avtomatlaşdırılmış idarəetmə sistemini tətbiq etmək niyyətindədir.
Nazirliyin məlumatına görə, layihə iki mərhələdə həyata keçiriləcək. Layihənin birinci mərhələsində paytaxtın daha işlək yollarında 100 video müşahidəçi kamerası, 30 elektron informasiya lövhəsi, paytaxt yollarında vəziyyətin (qəza, yolların ötürmə imkanları və s. ) müşahidə olunmasına imkan verən 400 video-araşdırıcı quraşdırılması nəzərdə tutulur.
Hərəkət axını barədə bütün informasiyalar vahid nəzarət mərkəzində yerləşən serverə daxil olacaq.
GPS sistemi vasitəsilə müşahidə mərkəzi bütün işıqforlara, elektron tablolara uzaqdan nəzarət edəcək ki, bu da yolların ötürmə qabiliyyəti ilə bağlı problemlərin operativ həllinə imkan verəcək. Paytaxtın bütün yollarında quraşdırılcaq elektron tablo sürüclərə tixaclar barədə məlumat verəcək.
Məlumatların ötürülməsi sistemi İnternet şəbəkəsi və GSM mobil rabitəsi əsasında işləyəcək ki, bu da marşrut avtobuslarının intervalı barədə opretaiv informasiya almağa imkan verəcək. Layihə 77 milyon dollara başa gələcək. Layihənin reallaşdırılması üzrə işlər 2011-ci il aprelin sonunadək başa çatacaq.
Məqalə müəllifi ilə əlaqə ünvanı: [email protected]
